307 jyl buryn joǵalǵan «San-Hose» kemesi tabyldy
ASTANA. QazAqparat - Kolýmbııa jaǵalaýynda osydan 3 ǵasyr buryn sýǵa batyp ketken ıspanııalyq «San-Hose» áskerı kemesi tabyldy.
Onyń ishinde úlken kólemde altyn men kúmis jáne ózge de asyl tastar bolǵan, dep jazady «Habar». Baǵaly baılyq Amerıka men Kýba izdeýshilerin tipti arazdastyryp ta qoıǵan edi. Sýǵa batqan asyl tastar birneshe mıllıard dollardy quraýy múmkin. Keme qaldyqtarynyń tabylýy men zerttelýin el prezıdentiniń ózi tikeleı baqylaýǵa alǵan. Alaıda qazynaǵa qatysty naqty aqparat joq.
«Osydan 307 jyl buryn joǵalǵan «San-Hose» kemesiniń tabylǵanyna qýanyshtymyn. Sý kóligi Karıb teńiziniń bizge tıesili bóliginen shyqty. Bul adamzat tarıhynda sý astynan tabylǵan eń úlken tabys bolyp sanalady. Tarıhı dúnıeni saqtaý úshin júrgiziletin zertteý jumystarynyń barlyǵy memleket baqylaýynda bolady», - deıdi Kolýmbııa prezıdenti Hýan Manýel Santos.
