304 gıdrotehnıkalyq qurylys halyq ómirine tikeleı qaýip tóndiredi – TJ mınıstri

ASTANA. KAZINFORM – Elimizde myń jarym gıdrotehnıkalyq qurylys bar jáne onyń jartysyna jýyǵy jóndeýdi qajet etedi. Bul týraly QR Tótenshe jaǵdaılar mınıstri Shyńǵys Árinov Úkimet úıinde aıtyp berdi.

«Sońǵy jyldary gıdrotehnıkalyq qurylystarǵa tıisti kóńil bólinbeıdi. Bul rette jóndeý jumystary tek respýblıkalyq qurylystarda júrgiziledi, kommýnaldyq jáne jeke jumystar jyldar boıy nazardan tys qalyp jatyr», - dedi Sh.Árinov Úkimet otyrysynda.

Sý resýrstary mınıstrliginiń dereginshe, respýblıkada 1500 gıdrotehnıkalyq qurylys bar, onyń jartysyna jýyǵy nemese 537-si jóndeýdi qajet etedi. Olardyń kópshiligi sý tasqyny qaýpi bar aımaqtarda – Qaraǵandy, Shyǵys jáne Batys Qazaqstan, Almaty, Aqtóbe, Aqmola, Abaı, Jambyl, Qostanaı oblystarynda ornalasqan.

Olar buzylǵan jaǵdaıda da jergilikti qulaqtandyrý júıeleriniń bolmaýy adam shyǵynyna ákeledi. Mundaı jaǵdaı 2010 jáne 2014 jyldary Almaty jáne Qaraǵandy oblystarynda bolǵan.

«Elimizde 304 gıdrotehnıkalyq qurylys halyqtyń ómirine tikeleı qaýip tóndiredi, onyń 216-synda nemese 71% jergilikti qulaqtandyrý júıeleri joq. Al Almaty, Aqtóbe, Aqmola, Shyǵys Qazaqstan, Qaraǵandy jáne Qostanaı oblystarynda tómen jaraqtandyrylǵan», - dedi TJ mınıstri.

Buǵan deıin Shyńǵys Árinov kóktemde elimizdiń 10 óńirinde sý tasqyny qaýpi boljanyp otyrǵanyn aıtqan edi.