30,2 trln teńge qajet: eldiń 2027 jylǵy bıýdjeti qandaı bolady
ASTANA. KAZINFORM — Qarjy vıtse-mınıstri Abzal Beısenbekuly Quryltaıda «2027-2029 jyldarǵa arnalǵan respýblıkalyq bıýdjet týraly» Zań jobasyn tanystyrdy. Zań jobasy Bıýdjet kodeksine sáıkes áleýmettik-ekonomıkalyq damý boljamy negizinde ázirlengen.
Onyń aıtýynsha, elimizdiń negizgi qarjylyq qujatyn qalyptastyrý kezinde ekonomıkanyń aǵymdaǵy ahýaly, barlyq bıýdjettik jáne makroekonomıkalyq táýekelder eskerildi.
— Bul bıýdjette basty nazar adamǵa jáne adamǵa arnalǵan ınvestıtsııalarǵa baǵyttalǵan. Sondaı-aq, memlekettik qoldaý sharalary arqyly bıznes pen óndirýshilerge qoldaý kórsetý josparlanǵan. Qarjylyq turaqtylyqty qamtamasyz etý úshin bıýdjettiń negizgi parametrlerine jáne Zań jobasynda kózdelgen tetikterge toqtala keteıin, — dedi Qarjy vıtse-mınıstri.
Zań jobasy 37 baptan turady. 2027 jyldyń úsh negizgi kórsetkishi: kirister — 25,4 trln teńge, shyǵystar — 30,2 trln teńge, tapshylyq — 4,6 trln teńge nemese jalpy ishki ónimge shaqqanda 2,3%-dy quraıdy.
— Bul rette bıýdjet tapshylyǵy 2029 jyly 0,4%-ǵa deıin tómendeýi boljanǵanyn atap ótý qajet. Memlekettiń menshikti kiris bazasy nyǵaıýda. Menshikti kirister 2029 jylǵa qaraı 23,4 trln teńgege deıin ósedi, — dedi Abzal Beısenbekuly.
Zań birden úsh jylǵa arnalǵan bıýdjet parametrlerin bekitedi jáne negizgi áleýmettik normatıvterdi belgileıdi.
— Óńirlerge sýbventsııalar kólemin bekitedi. Transfertter men kredıtterdi bólý tetigin aıqyndaıdy. Rezervter men nysanaly aýdarymdardy bekitedi. Memlekettik borysh lımıtteri men kepildikterdi belgileıdi. Sekvestrleýge jatpaıtyn bıýdjettik baǵdarlamalardyń tizbesin bekitedi. Sondaı-aq, zań jobasynda nysanaly ındıkatorlar tizbesi bekitiledi, — Abzal Beısenbekuly.
Buǵan deıin Quryltaı vıtse-spıkeri Danııa Espaeva 2027 jyldyń bastapqy kezeńi áli de kúrdeli kúıinde qalyp otyrǵanyn aıtqan edi.
