3000-nan astam aýyl joǵary jyldamdyqty ınternetke qosylady
ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstrligi men «Qazaqtelekom» AQ 3000-nan astam aýyldy ınternetke qosý týraly ınvestıtsııalyq kelisim jasasty.
Qol qoıylǵan mámileniń arqasynda talshyqty-optıkalyq baılanys jelisin salý jobasyn iske asyrý jospardan bir jyl erte — 2026 jyldyń sońyna deıin aıaqtalady. Al shalǵaı aýdandardaǵy baılanys 2027 jyldyń sońyna deıin jerseriktik baılanys arnalarymen qamtamasyz etilmek.
— Osylaısha, joba 2027 jyldyń sońyna qaraı eldegi aýyldardyń 99%-yn joǵary jyldamdyqty ınternetpen qamtamasyz etýge múmkindik beredi. Endi taıaý arada mektep, aýrýhana, ákimshilik ǵımarat, bıýdjettik uıymdar, sondaı-aq qoǵamdyq kirý núkteleri men memlekettik shekaralardaǵy 40-tan astam ótkizý beketteri jelige qol jetkize alady. Aýyldyq eldi mekenderdi talshyqty-optıkalyq (88%) jáne jerseriktik arnalar (12%) arqyly jelige qosady, — delingen habarlamada.
Jobaǵa quıylǵan ınvestıtsııalardyń jalpy kólemi 239 mlrd teńgeden asady –bıýdjetten tys qarajat. Bul «Qazaqtelekom» AQ iri telekommýnıkatsııalyq ınfraqurylymyn paıdalanýdyń arqasynda múmkin boldy.
Sondaı-aq, aýyldyq jerlerde uıaly baılanys bazalyq stantsııalary úshin ınfraqurylym kúsheıtilmek. Bul nysandarǵa deıin jetkizip talshyqty-optıkalyq jelini tóseý mobıldi ınternet pen baılanystyń sapasyn edáýir arttyrýǵa múmkindik beredi.
— Biz óńirlerdi damytýǵa teń jaǵdaı jasaıtyn tsıfrlyq irgetas qalap jatyrmyz. Mindetimiz — aýyldardy ınternetke qosýmen qatar, eldi mekenderdi eldiń tsıfrlyq ekojúıesine engizý. Bul bilim alý, medıtsına, memlekettik qyzmetterge teń dárejede qoljetkizýdiń negizi. Infraqurylym turaqty jáne ashyq túrde jumys istegende, shaǵyn bıznes, aýyl mektepteri men jastarǵa arnalǵan jańa kásiptik baǵyttardy damytýǵa jol ashady, — dedi Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev.
— Eń bastysy — bilim alý, ózin-ózi damytý men zamanaýı tehnologııalardy paıdalanýda aýyldaǵy bala men qaladaǵy balanyń múmkindikteri teń dárejede bolýy tıis. Biz tsıfrlyq teńsizdikti joıýdy elimizdiń túkpir-túkpirinen, shalǵaı jatqan aýyldardan bastadyq. Internetke qol jetkizý kópten beri sán bolýdan qaldy, bul halyqaralyq deńgeıde, onyń ishinde BUU men elimizdiń Prezıdenti málimdegendeı, negizgi qajettilik, — dedi «Qazaqtelekom» AQ basqarma tóraǵasy Baǵdat Mýsın.
Aıta ketelik Іshki ister mınıstri Erjan Sadenov ınternette táýlik boıy monıtorıng júrgiziletinin aıtqan edi.