3000 emes, 500 turǵyn: Kentterge qoıylatyn talap jeńildetiledi

ASTANA. KAZINFORM — «Qazaqstan Respýblıkasynyń ákimshilik-aýmaqtyq qurylysy týraly» Konstıtýtsııalyq zań jobasy «Ashyq NQA» portalynda jarııalandy.

Zań jobasy qoldanystaǵy ákimshilik-aýmaqtyq qurylys týraly zańnama negizinde ázirlengen. Qujat jekelegen normalardy naqtylaýǵa, quqyq qoldaný tájirıbesin jetildirýge jáne ony Konstıtýtsııaǵa sáıkestendirýge baǵyttalǵan.

Eń mańyzdy ózgeristerdiń biri — eldi mekenderge qoıylatyn talaptardyń qaıta qaralýy. Máselen, zań jobasynda eldi meken uǵymy alǵash ret naqty shekteledi:

— Eldi meken — keminde 50 adam halyq sany bolatyn turaqty turatyn jerge arnalǵan Qazaqstan Respýblıkasy aýmaǵynyń yqsham qonystanǵan bóligi, — dep naqtylanǵan.

Sondaı-aq kent mártebesine qatysty talaptar aıtarlyqtaı jeńildetilgen: «Kent — halyq sany keminde 500 adam bolatyn eldi meken» dep kórsetilgen. Bul burynǵy 3000 adamdyq shekten aıtarlyqtaı tómen, ıaǵnı, halqy azaıyp ketken kentterdi saqtap qalýǵa múmkindik beriledi.

Qalalarǵa qatysty da mańyzdy norma bar. Zań jobasynda oblystyq mańyzy bar qala mártebesin ıkemdi etý kózdelgen.

— Oǵan halqynyń sany 50 myń adamnan kem, biraq mańyzdy ónerkásiptik, mádenı nemese tarıhı mańyzy bar… qalalar da osy sanatqa jatqyzylýy múmkin, — dep jazylǵan zań jobasynda.

Bul halyq sany azaıyp bara jatqan, biraq strategııalyq mańyzy bar qalalardyń statýsyn saqtap qalýǵa baǵyttalǵan.

Sonymen qatar, jańa «oqshaýlanǵan qonystar» uǵymy engiziledi.

— Oqshaýlanǵan qonystar — … ákimshilik-aýmaqtyq birlikterge jatpaıtyn jáne tek statıstıkalyq maqsattarda esepke alynatyn qonystar, — delingen qujatta. 

Osylaısha qala men aýyl quramyna kirmeıtin shaǵyn qonystardyń quqyqtyq mártebesin naqtylaýdyń joly tabylyp otyr.

Eldi mekenderdiń mártebesin halyq sanyna baılanysty ózgertý úsh jylda bir qaralýy múmkin. Bul norma aýyldardyń birigýi nemese joıylýy protsesin jedeldetýi múmkin.

Sonymen birge, eldi mekenderdiń shekarasyn belgileý tártibi de naqty reglamentteledi.

— Eldi mekenderdiń shekaralaryn belgileý jáne ózgertý osy eldi mekenniń bekitilgen bas jospary nemese damý jáne qurylys shemasy negizinde… júzege asyrylady, — delingen qujatta.

Demek, bolashaqta aýyldar men qalalardyń shekarasy tek josparly qujattarǵa súıene otyryp ózgertiledi.

22 baptan turatyn qujat osy kúıinde qabyldanǵan jaǵdaıda 2026 jylǵy 1 shildeden bastap kúshine enedi.

Eske salsaq, Ekibastuz monoqala sanatynan shyǵarylǵan bolatyn.