300 myńnan astam adam arendalyq baspana alý úshin kezekte tur
ASTANA. QazAqparat - Arendalyq baspana boıynsha ákimdikterdiń kezeginde 300 myńnan astam adam kezekte tur. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Ulttyq ekonomıka vıtse-mınıstri Qaıyrbek Óskenbaev málim etti.
Bıyl jergilikti atqarýshy organdardyń kezegindegiler úshin baspana salý baǵytynda jáne jas otbasylarǵa 115 myń sharshy metr turǵyn úı salý josparlanǵan. Qazirgi kezde 101 myń sharshy metri paıdalanýǵa berildi, ıaǵnı bul kórsetkish jospardyń 88 paıyzyn qurap otyr. Jyl sońyna deıin qalǵan sharshy metrler tapsyrylatyn bolady.
Q. Óskenbaevtyń sózine qaraǵanda, jergilikti atqarý organdary jelisi boıynsha kezekte turǵandarǵa arnalǵan arendalyq baspanaǵa 337 112 adam úmitti. Olardyń arasynda UOS qatysýshylary men múgedekteri - 319 adam, jetimder - 47 613, áleýmettik álsiz sanatyndaǵylar - 143 414 adam, sondaı-aq memlekettik qyzmetshiler men bıýdjettik uıymdar jumysshylary, áskerıler - 143 610, al jalǵyz baspanalary apatty dep tanylǵan azamattardyń sany 2 165 adamǵa jetti.
«Jas otbasylarǵa bólek baǵdarlama bar. Jas otbasylar baspanalary tapsyrylǵannan keıin osy páterlerinde turyp, segiz jyldyń barysynda ony satyp alýǵa qarjy jınaı alady. Eger jınaǵan qarjysy jetpese, onda Turǵynúıqurylysjınaqbankinde 4 paıyz jyldyq mólsherde 15 jylǵa nesıe alady», - dedi mınıstrdiń orynbasary.
