300 myń teńge para alǵan mektep dırektory kinásin tolyq moıyndady
AQTÓBE. QazAqparat - Aqtóbe qalasyndaǵy №24 mektep gımnazııasynyń dırektory Aıdarhan Ázimbaev 300 myń teńge para alyp, esepshi Maıra Edilbaeva paraqorlyqqa deldal boldy. Búgin sotta sońǵy sózderin aıtqan aıyptalýshylar kináni tolyq moıyndap, keshirim surady, dep habarlaıdy QazAqparat tilshisi.
Aqtóbe qalasyndaǵy №24 mektep gımnazııasynyń dırektory Aıdarhan Ázimbaev Qylmystyq kodekstiń «Para alý», esepshi Maıra Edilbaeva «Paraqorlyqqa deldal bolý» baby boıynsha sot aldynda jaýap berip jatyr. Aıyptalýshylardyń qorǵaýshylary sot otyrysy kezinde №2, 24 mektep ujymy men ata-analardyń, oqýshylardyń Ázimbaev pen Edilbaeva týraly qoldaý hattaryn jetkizdi. Degenmen, memlekettik aıyptaýshy A.Ázimbaevty 3 jyl 6 aıǵa bos bostandyǵynan aıyryp, múlkin tárkileýdi, ómir boıy basqarýshylyq qyzmette jumys isteý quqyǵynan aıyrýdy surady. Al esepshi M.Edilbaevany ómir boıy bilim salasyndaǵy esepshilik qyzmette jumys isteý quqyǵynan aıyryp, 1 jyl qonys kolonııasyna jabýdy surady.
Aıyptalýshylar sot zalynda barlyq kinálaryn moıyndap, keshirim surady. Aıdarhan Ázimbaev kámelet jasqa tolmaǵan úsh balasy men zeınettegi ata-anasy baryn aıtyp, sottan aýyr jaza taǵaıyndamaýdy ótindi.
«Sybaılas jemqorlyqtyń aýyr qylmys ekenin bile tura qatelik jasadym. Jasaǵan isime ókinemin. Tergep, tekserý barysynda bar kináni moıyndadym. Ómir bolǵan soń, qatelik bolady. Otbasylyq jaǵdaıymdy eskere otyryp, bas bostandyǵymnan aıyrmaýdy suraımyn. Meni qoldaǵan, senim artqan áriptesterimnen keshirim ótinemin. Men 2003 jyldan bastap otbasymdy emes, jumysymdy birinshi orynǵa qoıyp, ózimdi jumysqa arnaǵan edim. Biraq aıaǵymdy shalys bastyp»,- dedi sońǵy sózinde A.Ázimbaev.
Aıyptalýshy M.Edilbaeva da kózine jas alyp, sottan keshirim surady.
