300 mln teńgeden asa zańsyz munaı saýdasyna qatysy bar kúdikti Dýbaıdan elge jetkizildi
ASTANA. KAZINFORM — Bas prokýratýra men Qarjylyq monıtorıng agenttiginiń qyzmetkerleri zańsyz munaı aınalymy úshin qylmystyq jaýaptylyqqa tartý maqsatynda Qazaqstan azamatyn Birikken Arab Ámirlikterinen ekstradıtsııalady.
— Kúdikti kommertsııalyq uıymnyń bas dırektory bola tura, 2022-2023 jyldary Aqtóbe oblysynda aldyn ala sóz baılasý arqyly adamdar tobymen jalpy somasy 300 mln teńgeden astam asa iri mólsherdegi munaıdy zańsyz ótkizý boıynsha áreketter jasaǵan. Qylmys jasaǵannan keıin qaskúnem jasyrynyp, ol halyqaralyq izdeýge jarııalanǵan. 2024 jyly izdeýdegi adam Dýbaıda anyqtalyp, Bas prokýratýranyń suraýy boıynsha ol jerden Qazaqstanǵa ekstradıtsııalandy. Qazir kúdikti ýaqytsha ustaý ızolıatoryna qamaldy, — delingen habarlamada.
Aıta keteıik, 2024 jyly bul qylmystyń sybaılasy bas bostandyǵynan aıyrý túrindegi jazaǵa sottalǵan. Aıyptalǵan qylmysty jasaǵany úshin múlki tárkilenip, 3 jyldan 6 jylǵa deıingi merzimge bas bostandyǵynan aıyrý jazasy qarastyrylǵan.
Budan buryn Grýzııadan ekstradıtsııalanǵan sottalýshydan memleket shyǵyny óndirilgenin jazǵan edik.