300 mln teńge zalal keltirgen: Túrkistanda 4 qarjy pıramıdasynyń jumysy toqtatyldy

TÚRKІSTAN. KAZINFORM - Óńirde qarjy pıramıdasyna qatysy bar 25 kúdiktige qatysty is sotta qaralyp jatyr. 

Túrkistan oblysy boıynsha ekonomıkalyq tergep-tekserý departamenti basshysynyń orynbasary Bahtııar Júzenovtiń aıtýynsha, qarjy pıramıdalarynyń negizgi qurbandary muǵalimder men meıirbıker bolǵan.

Sondaı-aq, jumyssyz azamattar da qarjy taýyp, pıramıdalarǵa salyp jibergen. Tipti, nesıe alyp, salymshy bolǵandar kezdesken.

- Túrkistan oblysy boıynsha ekonomıkalyq tergep-tekserý departamenti byltyr 4 qylmystyq is qozǵap, nátıjesinde «Charoit», «Eoulus», «Chia-Tai», «Q-Net» qarjylyq pıramıdalarynyń jumysy toqtatyldy. Uıymdastyrýshy jáne járdemdesýshi retinde 25 kúdiktige qatysty ister óndirispen aıaqtalyp, sotta qaralyp jatyr. Jalpy jábirlenýshiler 300 mln teńge jobasynda qarjysynan aırylǵan. Búginde departament tarapynan «Datamain Ai», «Asar baspana», «Chia-Tai» qarjy pıramıdalaryna qatysty qylmystyq is tergelip jatyr, - dedi Bahtııar Júzenov.

Sondaı-aq, spıker halyqty qarjy pıramıdalarynan saqtandyrý baǵytynda istelip jatqan jumystar boıynsha aıtyp ótti. 

- Túrkistan qalasyndaǵy 36 jelilik saıabaqta qarjylyq pıramıdalardyń tizimi jasaqtalǵan QR-kodtar ornatylǵan. Sonymen qatar ınternet jelisinen 1500 alaıaqtyq chat buǵattaldy. Qazirgi tańda Qarjylyq monıtorıng agenttigimen birge qarjy pıramıdalarynan saq bolý, qarjylyq saýattylyqty arttyrý, ekonomıkalyq qaýipsizdikti qamtamasyz etý maqsatynda mektepter men joǵarǵy oqý oryndarynda turaqty túrde dárister ótkizilip turady. Odan bólek, halyq kóp shoǵyrlanatyn oryndarda únemi qarjy pıramıdalarynyń qaýiptiligi jóninde málimetter taratylady,- dedi Bahtııar Júzenov.

Aıta keteıik, budan buryn Kentaý qalasynda alaıaqtyq qylmysy eki esege óskenin jazǵan bolatynbyz.