300 myńnan astam kómekke muqtaj bala anyqtaldy - Dınara Zákıeva
ASTANA. KAZINFORM — Bes jylda elimizde 1000-nan astam mektep salyndy. Bul týraly Quryltaıda «Qazaqstan balalary» tujyrymdamasynyń iske asyrylýyn talqylaýǵa arnalǵan Úkimet saǵatynda Quryltaı tóraǵasynyń orynbasary Dınara Zákıeva málim etti.
- Qazirgi kezde Qazaqstanda 7 mıllıonǵa jýyq bala turady. Bul – el halqynyń úshten biri. Qazaqstanda balalardyń quqyqtaryn qorǵaý – memlekettik saıasattyń eń mańyzdy baǵyttarynyń biri. Memleket basshysy Qasym-Jomart Toqaev balalardyń ál-aýqaty men qaýipsizdigine erekshe nazar aýdaryp keledi. Prezıdenttiń tapsyrmasymen balalardyń quqyqtaryn qorǵaý salasynda aýqymdy reformalar júrgizilip jatyr. Birinshiden, «Ulttyq qor – balalarǵa» baǵdarlamasy iske qosyldy, «Keleshek» júıesi engizildi. Ekinshiden, bes jylda elimizde 1000-nan astam mektep salynyp, «Keleshek mektepteri» ulttyq jobasy jýzege asyrylyp jatyr. Sonymen qatar 54 ońaltý ortalyǵy ashyldy. Úshinshiden, balalardyń qaýipsizdigi men quqyqtaryn qorǵaýǵa qatysty 11 zań qabyldandy jáne tıisti júe men ınfraqurylym quryldy, balalardyń quqyqtaryn qorǵaý jónindegi basqarmalar ashyldy. Tórtinshiden, balalar men otbasylardyń qıyn jaǵdaıǵa tap bolǵanyn erte anyqtaý jáne der kezinde kómek kórsetý úshin tsıfrlyq quraldar engizildi, - dedi D. Zákıeva.
Sonymen qatar ol mobıldik toptar men 160 otbasyn qoldaý ortalyqtarynyń jumysyna FSM Social júıesi engizilgenin, 111 biryńǵaı memlekettik baılanys ortalyǵy ashylǵanyn eske saldy. Bul balalarǵa óz quqyqtaryn qorǵaý qyzmetterine tikeleı júginýge múmkindik beredi. Sonymen qatar mektepterde «Balajan» platformasy iske qosyldy. Bul platforma arqyly psıhologııalyq qyzmetter qaýipterdi anyqtap, kómek kórsetedi. Al ýákiletti organdar bul baǵytta baqylaý júrgizedi.
- Osy mehanızmderdiń barlyǵy 3 jyldyn ishide 300 myńnan astam qıyn jaǵdaıdaǵy nemese kómekke muqtaj balalardy ýaqytyly anyqtap, kómek kórsetýge múmkindik berdi. Ár sannyń artynda balanyń taǵdyry jatyr. Besinshiden, mektepterde qaýipsizdik sabaqtary engizildi. Eń bastysy, balalardyń boıyna qundylyqtardy sińirý úshin «Adal azamat» baǵdarlamasy qabyldandy, - dedi Quryltaı tóraǵasynyń orynbasary.
Buǵan deıin «Ulttyq qor – balalarǵa baǵdarlamasy aıasynda bıyl 902 mln AQSh dollary aýdarylǵanyn jazǵan edik.