300 myńnan astam qazaqstandyq volonterlikpen aınalysady

ASTANA. KAZINFORM — Ulttyq volonterlik jeli júrgizgen áleýmettik zertteý 2025 jyly elimizde volonterlik qozǵalystyń jańa serpin alǵanyn kórsetti, dep habarlaıdy Mádenıet jáne aqparat mınıstrliginiń baspasóz qyzmeti.

Vedomstvo málimetinshe, zertteýdiń negizgi maqsaty — qoǵamnyń volonterlik qyzmetke degen kózqarasyn baǵalaý, onyń basym baǵyttaryn aıqyndaý jáne azamattyq sektor men memlekettik organdar arasyndaǵy ózara baılanystyń qanshalyqty tıimdi ekenin anyqtaý. Saýalnamaǵa Qazaqstannyń barlyq óńirinen 11 myńnan astam adam qatysyp, sonymen qatar volonterlik uıymdardyń jumysyna keshendi taldaý jasaldy.

— Zertteý qorytyndysy boıynsha, Qazaqstanda volonterlik qyzmet turaqty túrde damyp keledi. Qazirgi kezde volonterler sany 300 myńnan asyp, iske asyrylǵan jobalar bes ese artqan. Saýalnama nátıjesi halyqtyń 89%-y volonterlik qyzmet týraly biletinin jáne árbir úshinshi azamattyń volonterlik bastamalarǵa belsendi túrde qatysatynyn aıqyndady, — delingen mınıstrlik taratqan aqparatta.

Suranysqa ıe baǵyttar qatarynda áleýmettik qoldaý, qorshaǵan ortany qorǵaý jáne túrli is-sharalardy uıymdastyrýǵa arnalǵan volonterlik qyzmetter ataldy. Sonymen qatar «Igi ister marafony» men «Jyl volonteri» halyqaralyq syılyǵy sııaqty bastamalar salalyq jáne korporatıvtik volonterliktiń damýyna áseri etkeni de talqylandy.

Jasalǵan zertteý volonterlik uıymdardyń áleýmettik máselelerdi sheshýdegi rólin anyqtap, eldiń turaqty damýyna yqpal ete alatynyn kórsetti.

Buǵan deıin Májilis depýtaty Vera Kım volonterlik is-áreket bir rettik bastama emes, turaqty qoǵamdyq ınstıtýt ekenin aıtqan edi.