300 myńǵa jýyq azamat bankrottyqqa ótinim bere alady

ASTANA. KAZINFORM — Elimizde 300 myńǵa jýyq azamat bankrottyq protsedýrasyna ótinim bere alady. Bul týraly Qarjy vıtse-mınıstri Erjan Birjanov aıtty.

- Búginge deıin 51 myńnan astam jeke tulǵa, azamattarymyz bankrottyq protsedýrasyn qoldandy jáne 188 mlrd teńge qaryzy esepten shyǵaryldy. Endi qabyldanǵan sharalardyń nátıjesinde shamamen 300 myń Qazaqstan azamatty bankrottyq protsedýrasyn qoldana alady. Biraq, bul shara erikti túrde júzege asyrylady. Biz avtomatty túrde barlyq tulǵany bankrot dep tanı almaımyz. Azamat ótinim bergen jaǵdaıda ǵana skorıng saraptama júrgizemiz, - dedi vıtse-mınıstr Ortalyq kommýnıkatsııalar qyzmetindegi brıfıngte BAQ ókilderiniń saýalyna oraı. 

Buǵan deıin Memlekettik qyzmet isteri agenttigi Qarjy mınıstrligine adamdy bankrot dep tanýǵa qajet qujattardyń sanyn barynsha azaıtyp, azamattarǵa qaryz máselelerin jedel sheshýge keń múmkindik berý jóninde usynymdar engizgen edi. Osy usynymdardyń negizinde Qarjy mınıstrligi sottan tys bankrottyq rásimin aıtarlyqtaı jeńildetti.