300 myń teńge aılyq: Rınat Zaıytovtyń usynysyna Tamara Dúısenova jaýap berdi

Premer-Mınıstrdiń orynbasary Tamara Dúısenova Májilis depýtaty Rınat Zaıytovtyń eń tómengi aılyq 300 myń teńge bolýy kerek degen usynysyna pikir bildirdi, dep habarlaıdy QazAqparat tilshisi.

«Eń tómengi eńbekaqy degen – biliktiligi joq jumysshynyń eshqandaı ústemeaqysyz aılyǵy. ıAǵnı, ár jumys berýshi osydan tómen tólemeýi kerek. Eńbek ınspektsııalary teksergen kezde mundaı faktiler anyqtalsa, aıyppul salynýy múmkin», – dedi vıtse-premer búgin elordada Eńbek kúnine oraı ótken forýmnan keıin tilshiler suraǵyna jaýap bere otyryp.

Premer-Mınıstr orynbasarynyń paıymynsha, Májilis depýtatynyń usynysy ekonomıkanyń deńgeıine saı kelmeıdi.

«Memlekettiń ekonomıkalyq múmkindikterin eskerýlerińiz kerek qoı. Qazir ortasha aılyq 365 myń teńgeden sál joǵary. Osydan alyp eseptep kórseńizder, búginde bizdiń ekonomkıkanyń deńgeıi men jumys berýshiler osyndaı deńgeıde ǵana tóleı alady. Bizde (eń tómengi eńbekaqy – red.) 3-4 jyl buryn 28 myń teńge bolǵan. Keıin 42 500-den 60 myń, 70 myń bolyp ósti. Endi 85 500 etý qarastyrylyp otyr. Bul aldyńǵy kórsetkishterge qaraǵanda ósim ǵoı», – dedi Tamar Dúısenova.