300 kúnde 60 el: Úndistandyq saıahatshylar avtostoppen Qazaqstanǵa jetti

«Bul bizdiń Qazaqstanǵa alǵash kelýimiz. Maqsatymyz - álemniń 60 elin avtostoppen aralaý. Saıahatymyz óz Otanymyz - Úndistannan bastalyp, Ońtústik Azııa, Qytaı jáne Ortalyq Azııaǵa jalǵasty. Qazaqstannan soń Reseıge, odan ári Eýropaǵa baramyz. Sońǵy aıaldamamyz Latyn Amerıkasy men AQSh bolmaq. Shynyn aıtqanda, biz Ortalyq Azııa elderi týraly kóp bile bermeımiz. Qazaqstan óz kezeginde bizdi tańǵaldyrdy. Óte ádemi jáne keń jazıraly el. Sizderdiń dalalyq jazyqtaryńyzdy sózben jetkizý múmkin emes. Adamdar da qarapaıym jáne qonaqjaı. Bizdi tanymaıtyn adamdar jyly shyraımen qarsy aldy. Saıahatymyzdyń eń uzaq ýaqyty Qazaqstanda ótti», - dep óz áserimen bólisti Pravın Mehta.

Onyń aıtýynsha, saıahat bıylǵy jyldyń sáýir aıynda bastaldy. Qazaqstan tizimdegi toǵyzynshy el. Qyrǵyzstannan keıin Tarazǵa, Almatyǵa, endi Nur-Sultan qalasyna taban tiredi.

«Búgin saıahatymyzdyń 75-shi kúni. Sizderdiń elderińiz 9-shy el bolyp otyr. Alda áli 51 eldi aralaýymyz kerek, jalpy 300 kúnniń ishinde 60 eldi aralaımyz dep jospar qurdyq. Saıahatymyzdyń sońǵy núktesi Brazılııa dep jobalap otyrmyz. Biz buny belsendi saıahat dep sanaımyz. Jáne ár el úshin arnaıy baǵdarlamamyz bar. Bolǵan jerimizde jergilikti adamdarmen, elshilik jáne jýrnalıstermen áńgimelesip, óz áserimizben bólisemiz. Maqsatymyz - saıahat arqyly adamdardy shabyttandyrý», - deıdi ol.

Saıahatshylar elordada 3 kúnge toqtaǵan jáne olardyń naqty jospary bar. Onyń ishinde Qazaqstandaǵy Úndistannyń Elshisimen, astanalyq sýretshilermen kezdesý jáne Nazarbaev Ýnıversıtetiniń stýdentterimen áńgime-dúken qurý.

«Maǵan Almaty qatty unady. Keremet qala. Nesimen unady deseńiz?! Dámhanada otyrǵanymyzda adamdar bizge túsinistikpen qarap, jón siltep, qurmet kórsetti», - dedi P. Mehta.

Úndistandyq meımandardyń sózine sensek, belsendi saıahatty olar osydan 10 jyl buryn bastaǵan. ıAǵnı, alǵash óz elderinen bastap, keıin saıahat geografııasy keńeıe bergen.

«Uzaq joldan sharshamaısyzdar ma?» degen suraqqa: «Iá, óz úıimizdi saǵynamyz. Árıne, saıahattaý barysynda demalýdy da umytpaımyz. Degenmen, bul saýyq qurýdyń erekshe túri», - dep jaýap berdi.

Sondaı-aq, týrıster Reseıden soń Eýropa elderine jol tartatynyn, jalpy alǵanda 300 kúnniń ishinde 70 myń shaqyrymdy júrip ótetindikterin jetkizdi.

«Avtostop saıahatymyzǵa qoldaý kórsetýshiler ártúrli adamdar. Mysaly, avtokompanııa bizge ózderiniń demo-avtokólikterin usyndy, sondaı-aq «Rotary International» qaıyrymdylyq uıymy túrli uıym ókilderimen kezdesý uıymdastyrýda qoldaýlaryn kórsetti. ıAǵnı, qoldaý bildirý degenimiz tek qana qarjylaı kómek kórsetý degen sóz emes. Biz Qytaı, Bangladeshke barǵanda tilderin túsinbedik, olar da bizdiń tildi túsinbedi. Biraq ym-shara arqyly bir-birimizdi uǵyndyq. Biz vegetarıandarmyz, ár elge barǵanda ym-sharamen bolsa da túsindirýge tyrysamyz», - dedi Pravın Mehta.

Sonymen qatar, jolaýshylar ózderi saıahattaǵan kóp elderde jol sapasynyń jaqsy deńgeıde ekenin jáne Úndistanda jol sapasy problemasynyń baryn atty.

«Saıahatymyzdyń bolashaq josparynda Afrıka elderi bar. Bizdiń basty maqsat - túrli ult ókilderimen kezdesip, olardyń mádenıeti men dástúrin tanyp, bilý. Jáne ózimiz týraly aıta otyryp, olardyń suraqtaryna jaýap berý», - dedi ol.