300-ge jýyq jas ofıtser Qurlyq áskerleriniń ınstıtýtyn támamdady (FOTO)

ASTANA. QazAqparat - Almatydaǵy Qurlyq áskerleri Áskerı ınstıtýtynyń 265 túlegi áskerı oqý ornyn bitirgeni týraly dıplom aldy, dep habarlady Qorǵanys mınıstrliginiń baspasóz qyzmeti.

Olardyń 3-eýi Qyrǵyz Respýblıkasynyń azamattary, 12 túlek Tájikstan Respýblıkasynyń azamattary. Olar jaýyngerlik mashyq pen áskerı tártipte ózderin jaqsy qyrlarynan kórsetti.  Túlekter arasynda oqýdy qyzyl dıplom men altyn medalǵa bitirgen 6 leıtenant bar. Olar: Erkebulan Qońyrbaı, Bekbolat Qarlybaev, Aleksandr Klımenko, Baýyrjan Nursultanov, Ámir Esimseıit pen Danııar Eskendir.  Ekinshi batalonnyń túlekteri joǵary saptyq daǵdy jáne jalpyáskerı jarǵylardy bilýlerimen erekshelenedi. Olar Máskeýdegi Qyzyl alańdy adymdap ótip,  Uly Otan soǵysyndaǵy Jeńistiń 70 jyldyǵyna arnalǵan paradqa qatysty.

Qurlyq áskerleri Áskerı ınstıtýtynyń 46 jyldyq tarıhy bar ekenin aıta keteıik. Qurylǵan sátten bastap JOO-da ártúrli mamandyqtar boıynsha 17 myń ofıtser daıyndaldy. Qazirgi ýaqytta olar ózderiniń bilim alǵan joǵary oqý ornynyń dańqyn asqaqtata otyryp, Qazaqstan Respýblıkasynyń Qarýly Kúshteri men TMD elderinde qyzmet atqarýda. Túlekterdiń birshamasy iri áskerı bólimsheler men vedomstvolardy basqarýda. Joǵary áskerı ataqtar men úkimettik nagradalarǵa ıe bolyp otyr. Instıtýt túlekteri arasynda Halyq qaharmany general-leıtenant Baqytjan Ertaev bar, 13 túlek Keńes Odaǵynyń, Reseı men TMD-nyń ózge elderiniń batyrlary ataǵyn ıemdendi. 53 túlek QR Qarýly Kúshteri men ózge elderdiń, ıaǵnı, Reseı Federatsııasy, Qyrǵyz Respýblıkasy jáne Tájikstan Respýblıkasy Qarýly Kúshteriniń generaldary bolyp tabylady.  Áskerı ınstıtýttyń kýrsanttaryn daıyndaý 10 kafedrada júzege asyrylady.

Instıtýt ujymdyq qaýipsizdik týraly Shart Uıymy múshe memleketteriniń Qarýly Kúshteri úshin áskerı kadrlardy birlesip daıyndaý oqý oryndarynyń tizbesine engizildi. JOO-da Qyrǵyz Respýblıkasy men Tájikstan Respýblıkasynyń áskerı qyzmetshileri bilim alýda.