300-ge jýyq ondatr terisin Almatyǵa aparyp satpaq bolǵan azamat qolǵa tústi
TALDYQORǴAN. QazAqparat - Almaty oblysynda kóliginiń júksalǵyshyna 200 kg balyq pen ondatrdyń 300-ge tarta terisin tıep, Almaty qalasyna áketip bara jatqan Balqash aýdanynyń turǵyny ustaldy, dep habarlaıdy QazAqparat tilshisi.
«Qapshaǵaı qalasynyń mańynda toqtatylǵan Toıota avtokóliginiń júksalǵyshynan tasymaldaýǵa ruqsat qujaty joq 89 kg jaıyn jáne 107 kg sazan balyǵy, sondaı-aq, sý tyshqanynyń 298 terisi tabyldy. Bul fakti boıynsha Balqash aýdanynyń 25 jastaǵy turǵynyna qatysty QR Qylmystyq kodeksiniń 196-baby 1-tarmaǵy boıynsha sotqa deıingi tekserý amaldary júrgizilip jatyr»,- dedi Qapshaǵaı qalasy tabıǵatty qorǵaý polıtsııasynyń ókili, polıtsııa kapıtany Rınat Botaev.
Polıtsııa ókilderi zańsyz aýlanǵan balyq arnaıy qabyldaý oryndaryna ótkizilip, odan túsken qarjy memleket paıdasyna aýdarylatynyn aıtty. Sonymen qatar, osy derek boıynsha terilerge tıisti saraptama taǵaıyndalyp, onyń korytyndysy is materıalyna qosylatynyn jetkizdi.
Quqyq buzýshynyń aıtýynsha, ol balyq pen terilerdi Almaty qalasyna aparyp satý úshin belgisiz bireýlerden satyp alǵan. Degenmen, tártip saqshylary zańnama talaptaryn bilmeý azamattardy zań aldyndaǵy jaýapkershilikten bosatpaıtynyn eskertedi.
