300-ge jýyq qazaqstandyq bir táýlikten beri Taılandtan elge jete almaı otyr
ALMATY. QazAqparat - «SKAT» áýe kompanııasynyń Ýtapao - Astana reısiniń ushaǵy bir táýlikten beri tehnıkalyq aqaý kesirinen ushyp shyǵa almaı otyr, dep habarlaıdy QazAqparat tilshisi.
Ýtapao - Astana baǵytyndaǵy «SKAT» áýe kompanııasynyń VSV465 reısi 11 naýryz kúni 17:00-de ushyp shyǵýy tıis bolatyn.
«Bul reıs tehnıkalyq sebepterge baılanysty oryndalmaıdy. 283 jolaýshyǵa týroperatorlar ystyq tamaq usynyp, qonaq úıge ornalastyrý týraly usynys aıtty», - deıdi QR IIDM Azamattyq avıatsııa komıtetiniń baspasóz qyzmeti.
«SKAT» áýe kompanııasy ushaqtyń aqaýy jóndelip, ushýǵa daıyn ekenin habarlady.
«Taıland áýejaıynda ushý aldyndaǵy daıyndyq kezinde qosymsha tehnıkalyq tekserýge qajettilik týdy. Tehnıkalyq tekseris barysynda barlyq týrısterge qonaq úıge ornalasý jóninde usynys berildi. Qazir ushaq ushýǵa daıyn. Jolaýshylar tirkeýden ótip jatyr. Bir saǵat kóleminde ushyp ketedi. Ótemaqy máselesine qatysty týrpaket alynǵan týragenttikke habarlasýǵa bolady»,- dedi áýe kompanııasynan.
Sonymen qatar, Almaty - Phýket baǵytyndaǵy reıs te osy sebeppen kestesinen jańyldy.
«Ushaqtar ýaqyt boıynsha tizbektelgen. Almaty reısi de sol úshin keshigip jatyr. Ushý ýaqyty anyqtalyp jatyr», - dedi «SKAT» kompanııasynyń ókilderi.
