300-ge jýyq avtobýstyń jolaýshylarǵa qyzmet kórsetýge quqyq beretin kýálikteri keri qaıtaryldy
ASTANA. 15 mamyr. QazAqparat - Áldeneshe ret tártip buzǵany jáne kestelerdi saqtamaǵany, avtobýstardy belgilenbegen oryndardan attandyrǵany úshin 12 tasymaldaýshynyń (303 avtobýs) qyzmet kórsetýge quqyq beretin kýálikteri keri qaıtaryldy.
Olardyń arasynda qalaaralyq jáne oblysaralyq jolaýshy tasymaldaıtyn turaqty qatynap júrgen avtobýstar bar, dep habarlady Kólik jáne kommýnıkatsııa mınıstrliginiń baspasóz qyzmeti.
QR KKM-niń Kóliktik baqylaý organdarynyń tekseristeriniń qorytyndylary boıynsha 2013 jyldyń basynan beri jolaýshylar tasymalymen shuǵyldanatyn 2372 tasymaldaýshy ákimshilik jaýapkershilikke tartyldy. Atap aıtqanda kompanııalar júrgizýshilerdiń eńbek jáne tynyǵý erejelerin buzǵan, júrgizýshilerdi reıs aldyndaǵy medıtsınalyq tekseristen jáne avtokólik quraldaryn tehnıkalyq baıqaýdan ótkizbegen, sonymen birge jolaýshylar men bagajdy tasymaldaý erejelerin buzýǵa jol bergen.
Munyń syrtynda, kóliktik baqylaý beketteriniń qyzmetkerleri bıylǵy jyldyń basynan beri sheteldik tasymaldaýshylar tarapynan jiberilgen 2075 ereje buzýshylyǵyn anyqtaǵan. Búgingi kúnge kóliktik baqylaý beketteri ruqsat berý júıesi talaptaryn oryndamaǵan 35 sheteldik tasymaldaýshylardy ustaǵan. Olardyń arasynda belarýssııalyq 8, túrkııalyq 5, taǵy basqa tasymaldaýshylardyń joldary kesilgen.
Jalpy, sheteldikterge ruqsat etý qujattary halyqaralyq kelisimder negizinde beriledi. Árbir memleket áriptes elge óz aýmaǵy arqyly júk tasymaldaýǵa quqyq beretin belgili bir mólsherde kvota bólip otyrady. Al kvota almaǵandardyń shet memleketterde júk tasymaldaýǵa quqyǵy joq. Bul sharalar ár memlekettiń óz ishinde otandyq tasymaldaýshylardy qoldap otyrýǵa baǵyttalǵan.
