300-den astam qazaqstandyq kýrsant shetelde bilim alyp jatyr
ASTANA. KAZINFORM — Qazaqstandyq kýrsanttar sheteldiń áskerı joǵary oqý oryndarynda bilim alyp, halyqaralyq tájirıbeni meńgerip júr. Bul týraly OKQ-de ótken baspasóz máslıhatynda QR Qorǵanys mınıstrligi Áskerı bilim jáne ǵylym departamentiniń bastyǵy, polkovnık Murat Oljabaev aıtty.
— Búginde 300-den astam qazaqstandyq kýrsant Qytaı, Túrkııa, Koreıa Respýblıkasy, AQSh, Reseı, Ázerbaıjan, Armenııa jáne Belarýs elderiniń áskerı joǵary oqý oryndarynda oqyp jatyr. Oqý halyqaralyq kelisimder aıasynda Qarýly kúshter úshin suranys joǵary mamandyqtar boıynsha uıymdastyryldy. Bul kýrsanttarǵa áskerı daıarlaýdyń zamanaýı tásilderin meńgerýge, jańa tehnologııalarmen tanysýǵa jáne halyqaralyq tájirıbeni ıgerýge múmkindik beredi, — dedi spıker.
Sonymen qatar departament basshysynyń aıtýynsha, Qorǵanys mınıstrligi elimizdiń jetekshi azamattyq joǵary oqý oryndarymen de yntymaqtastyqty damytyp jatyr.
— Birlesken bilim berý baǵdarlamalary áskerı medıtsına, dene daıarlyǵy, aýdarma isi, áskerı qurylys, áskerı orkestr jáne dırıjerlik qyzmet, sondaı-aq basqa da suranysqa ıe baǵyttar boıynsha júzege asyrylyp otyr. Mundaı áriptestik áskerı jáne azamattyq bilim berý salalarynyń ǵylymı áleýetin ushtastyryp, mamandar daıarlaý múmkindigin keńeıtýge jáne túlekterdiń kásibı biliktiligin arttyrýǵa yqpal etedi, — dedi spıker.
Eske salaıyq, áskerı oqý oryndaryna qujat tapsyrý jeńildedi. Budan bylaı qujatty endi onlaın tapsyrýǵa bolady.
