300 bala Astana ákiminiń Jańa jyldyq shyrshasyna qatysty (FOTO)
ASTANA. QazAqparat - Elordadaǵy Oqýshylar saraıynda qala ákiminiń atynan Jańa jyldyq shyrsha ótti.
"Búgingi shyrshaǵa Astanadaǵy 300-den astam balaqaı qatysýda. Onyń 150-i - balalar úıleriniń tárbıelenýshileri bolsa, qalǵan 150 bala - túrli olımpıadalar men bilim konkýrstarynyń jeńimpazdary men júldegerleri. Shyrsha merekesi bıyl «Máńgilik Eldiń qasıetti qundylyqtary» taqyrybymen ótýde. Bul balalar jyl boıy Jańa jyl merekesin kútedi, sondyqtan biz olarǵa umytylmas saltanat jasaǵymyz keldi. Teatrlandyrylǵan kórinisti qoıý úshin rejısser Talǵat Temenovti shaqyrttyq", - dep atap ótti Astana qalasy Bilim basqarmasynyń basshysy Elmıra Sýhanberdıeva.
Onyń aıtýynsha, balalarǵa Oqýshylar saraıyna ekskýrsııalar uıymdastyrylyp, planetarıı, ınteraktıvtik park boıynsha saıahat jasaldy.
"Árbir qatysýshy Astana ákimi atynan tátti bazarlyqtar men uıaly telefon alady", - dep atap ótti ol.
