30 jyldyń qorytyndysy: Qaraǵandylyq chempıondar esimi álemdik sport tarıhyna jazyldy
NUR-SULTAN. QazAqparat – Vasılıı Jırov, Irına Hýdorojkına, Andreı Mızýrov, Gennadıı Golovkın, Serik Sápıev, Dmıtrıı Karpov, Serik Eleýov, Elmıra Syzdyqova. Táýelsizdiktiń 30 jyly ishinde búkil eldiń maqtanyshyna aınalǵan qaraǵandylyq sportshylardyń tizimin sheksiz jalǵastyrýǵa bolady.
Olardyń kópshiligi – Álııa Moldaǵulova atyndaǵy oblystyq mamandandyrylǵan olımpıadalyq rezervtegi mektep-ınternat-kolledjiniń tárbıelenýshileri.
50 jyldyq tarıhynda oqý orny belgili sportshylardyń birneshe urpaǵyn ósirdi jáne 90 jyldardyń synaǵynan abyroımen ótti.
– 90 jyldary mamandardyń ketýi bastaldy. Bilikti jattyqtyrýshylar kóp boldy, – dep eske alady mektep basshysy Erden Halılın. – Biraq bárin ustap turǵan uıytqy qaldy. Onyń alǵashqy dırektory Baǵdáýlet Ýrbısınov mektep úshin kóp jumys jasady. Ol 23 jyl eńbek etip, eń qıyn ýaqytty bastan keshti. Sporttyq qural-jabdyqtar jetispedi, jıyndar men jarystarǵa barý qıyn boldy. Óz qarajatymyzben júrýge týra keldi, jáne bul múmkindik bárinde bola bermedi.
Úlken qıyndyqtarǵa qaramastan, mektep tárbıelenýshileri jattyǵýdy jalǵastyryp, jaqsy nátıjeler kórsetti. 1994 jyly Arkadıı Topaev bokstan álem chempıony boldy. Eki jyldan keıin sportshy Irına Hýdoroshkına Olımpıada oıyndarynda kúmis jeńip aldy. Al 1997 jyly Andreı Mızýrov velosporttan álem kýbogynyń ıegeri atandy.
Jaqsy jaqqa ózgerister 2000 jyldary – dene shynyqtyrý jáne sport boıynsha memlekettik baǵdarlama qabyldanǵannan keıin bastaldy. Oblysta birinen soń biri «Jastar», «Dáýlet», «Jas suńqar» sport mektepteri ashyla bastady. Ol kezde dzıýdodan ulttyq quramanyń 70%-yn qaraǵandylyq sportshylar qurady.
– Bul Maksım Rakov, Erjan Shynkeev, Beıimbet Qanjanov, Jansaı Smaǵulov, Islam Bozbaev. Olar ótken reformanyń alǵashqy týmalary dep aıtýǵa bolady, – dep esepteıdi Erden Halılın. – Biz sondaı-aq olımpıadalyq tárbıelenýshiler – Dmıtrıı Karpovty, Serik Sápıevti, Serik Eleýovti maqtan tutamyz. Gennadıı Golovkın bizdiń mektep bazasynda ǵalym Kenjebaevtan tálim aldy.
Búginde Álııa Moldaǵulova atyndaǵy mektepte 57 jattyqtyrýshy Qaraǵandyda 350 jáne Temirtaý fılıalynda 150 sportshy tárbıeleýde. Eki jyl buryn oqý ornyna kolledj mártebesi berildi. Endi munda balalarmen jumys isteý úshin bilikti jattyqtyrýshy-oqytýshylar daıarlanady.
Mektepte sporttyń 15 túri damyǵan. Olardyń qatarynda boks, kúres, velosport, dzıýdo, eskek esý, jeńil jáne aýyr atletıka, júzý, konkımen júgirý jáne shańǵy sporty bar. Qaraǵandy oblysynda ulttyq sport túrlerin damytýǵa erekshe kóńil bólinetindikten, ótken jyly qazaq kúresinen bólim ashyldy. Balýandar óte qatal irikteýden ótedi, sondyqtan munda úzdikterdiń úzdigi aınalysady.
Óńirde sporttyń 100-ge jýyq túri damyǵan, onyń 44-i olımpıadalyq. Qoljetimdilik tegin sport sektsııalary men memlekettik sport mektepteri esebinen qamtamasyz etiledi.
Múmkindigi shekteýli adamdar týraly da umytpaıdy. Qaraǵandyda múgedekter sporty boıynsha mamandandyrylǵan sport mektebi jumys isteıdi. Qazaqstan ulttyq quramasyna 90 sportshy kiredi.
Táýelsizdik jyldarynda barlyǵy 67 iri sport alańdary, sondaı-aq óńirdiń qalalary men aýdandarynda ondaǵan dene shynyqtyrý-saýyqtyrý keshenderi salyndy. Bıyl bıýdjet jáne bıýdjetten tys qarajat esebinen taǵy 13 sport nysanynyń qurylysy júrip jatyr. Jyl saıyn oblys boıynsha 40-tan astam sport alańdary, hokkeı korttary men fýtbol alańdary ornatylady.
Foto – Álııa Moldaǵulova atyndaǵy oblystyq mamandandyrylǵan olımpıadalyq rezervtegi mektep-ınternat-kolledjiniń muraǵatynan
