30 jyldyq tájirıbesi bar qaraǵandylyq medbıke: Mamandyqty tańdaǵanyma ókinbeımin
ALMATY. QazAqparat - Medıtsına salasynda 30 jyldyq tájirıbesi bar qaraǵandylyq medbıke Alshagúl Isabaeva QazAqparat tilshisine óziniń jumysy týraly áńgimelep berdi, dep habarlaıdy QazAqparat tilshisi.
Alshagúl Isabaeva – Jambyl oblysynyń týmasy. Temirtaý qalasyna 1985 jyly kelgen.
«Men 1985 jyly Temirtaý qalasynda ornalasqan medıtsınalyq ýchılışıge oqýǵa tústim. Oqýdy bitirgen jyly mamandyǵym boıynsha jumysqa ornalastym. Bala kezimnen medıtsına qyzmetkeri bolýdy armandadym dep aıta almaımyn. Mýzykaǵa jaqyn boldym. Án salǵandy jaqsy kóretinmin. Ánshi bolamyn dep oıladym (kúldi). Meniń basqa qalaǵa ketý týraly sheshim qabyldaǵanymda ata-anam qarsy bolǵan joq. Sóıtip, Temirtaý medıtsınalyq ýchılışesine tústim. Bul mekeme áli jumys isteıdi. Ata-anam meniń jaqsy jáne paıdaly mamandyq tańdaǵanyma qýandy. Olar biz sııaqty úlken otbasyǵa bir medıtsına mamany kerektigin aıtatyn», - deıdi keıipkerimiz.
Ol alǵashqy eńbek jolyn Temirtaý elektrometallýrgııa kombınatynda medbıke bolyp bastady.
«Temirtaý elektrometallýrgııa kombınatynda bolashaq kúıeýmen tanystym. Ol da sol zaýytta master bolyp jumys isteıtin. Ekeýimiz 1988 jyly shańyraq kóterdik. Zaýytta 1995 jylǵa deıin jumys istedim. Keıin dekrettik demalysqa shyǵyp, úıde otyrdym. Esterińizde bolsa, 90-shy jyldar qıyn boldy. Jumys joq. Halyq otbasyn asyraý úshin kez kelgen jumysty isteýge ázir edi. Men 2000 jyly Temirtaý qalasyndaǵy Narkologııalyq dıspanserge jumysqa turdym. Sol jerde bas medbıkege deıin kóterildim. 2012 jyldan bastap №4 qalalyq emhanada jumys isteımin», - dedi ol.
Alshagúl Isabaeva jumys barysynda ártúrli adamdarmen kezdeskenin aıtty.
«Men kópbalaly otbasynda óstim. Bizdi ata-anamyz árqashan adamdarǵa kómektesýge úıretti.Tipti jumystan tys ýaqytta maǵan adamdar medıtsınalyq kómekke júginetin. Men kómektesýge árqashan daıynmyn ári qýanyshtymyn. Kómek kórsetý – kásibı mindetim», - deıdi ol.
Pandemııa bastalǵaly meıirbıkelerdiń jumysy arta tústi. Temirtaý sııaqty shaǵyn qalaǵa da medıtsınalyq qyzmetker qajet boldy.
«Pandemııa bastalǵan kezde bárine daıyn boldyq. Jazda koronavırýs órship, sharyqtaý shegine jetkende koronavırýsqa shaldyqqan naýqastar jatatyn ınfektsııalyq ortalyqta bir aı jumys istedim. Ońaı bolǵan joq. Jaz. Ystyq. Biz skafandrmen júrdik. Qaýipti aımaqta boldyq», - dep eske aldy ol.
Búgingi kúni Alshagúl Isabaeva óziniń negizgi jumysymen qatar, koronavırýs ınfektsııasyn juqtyrǵan balalardy tekseretin mobıldi toptyń múshesi.
«Biz shaqyrtý túsken mekenjaılarǵa baramyz. Qazir balalar jıi aýyra bastady», - deıdi ol.
Onyń aıtýynsha, ártúrli medıtsınalyq mekemelerde jumys isteý arqyly mol tájirbıe jınaǵan.
«Meniń eńbek ótilim – 30 jyl. Men únemi qatarda boldym, áli de solaı. Osy mamandyqty tańdaǵanyma ókinbeımin. Adam óz jumysyn jaqsy kóretin bolsa, jumystaǵy kez kelgen qıyndyqty jeńe alady. Eń bastysy, eńbegimiz adamdarǵa paıda men úmit ákeletinin umytpaýmyz kerek. Otbasyma da ýaqyt tabamyn. Meniń úsh balam jáne bes nemerem bar», - dep túıindedi ol.
