30 jylda adamdardy qutqarǵan 35 áskerı qyzmetshi mert boldy
«Elimiz táýelsizdik alǵaly 1423 áskerı qyzmetshi memlekettik nagradalarmen marapattaldy. Onyń ishinde 35 qyzmetkerge nagrada qaıtys bolǵannan keıin berildi», - delingen Qorǵanys mınıstrliginiń QazAqparat agenttiginiń resmı saýalyna berilgen jaýapta.
Ótken jyly adam ómirin saqtap qalǵany úshin 9 Otan qorǵaýshy marapatqa ıe boldy.
Atap aıtsaq, tótenshe jaǵdaıda adam ómirin qutqarǵan janqııarlyǵy úshin Qazaqstan Respýblıkasynyń memlekettik nagradasy «Erligi úshin» medalimen aǵa leıtenant Eskendir Qasymbaı marapattaldy. Ol 44813 áskerı bóliminiń (Áýe qorǵanysy) jeke radıolokatsııalyq rotasynyń baılanys jáne avtomattandyrylǵan basqarý júıeleriniń bastyǵy.
Ótken jyly 14 shildede Aqmola oblysynyń Chebache kóli jaǵalaýynda júgirý kezinde aǵa leıtenant kómek suraǵan daýysty estıdi. Baıqaǵanyndaı kól ortasynda úrlemeli matrasta ákesi men onyń bes jasar balasy qalǵan. Qatty jel olardyń kól jaǵalaýyna shyǵýǵa múmkindik bermegen. Eskendir oılanbastan kólge súńgidi. Sol tusta reseılik azamat Polına Saveleva da kómekke keldi. Ol kásibı júzýshi eken. Birlesken is-qımyldyń arqasynda kólde qalǵandar jaǵalaýǵa shyǵaryldy.
Sonymen qatar «Erligi úshin» medalimen 29011 áskerı bóliminiń (áskerı-teńiz kúshteri) desanttyq-shabýyldaý batalony teńiz jaıaý áskeri (rezerv) rotasynyń komandıri, kapıtan Aǵabek Maqulbek marapattaldy.
Ol ótken jyly 14 maýsymda keshkilik Aqtaýda teńiz jaǵalaýynda serýendep júrip katerden balanyń sýǵa qulaǵanyn baıqaıdy. Aǵabek kómekke asyǵyp, sýǵa súńgip balany aman alyp qaldy.
Odan bólek, Qorǵanys mınıstrliginiń «El qorǵany» vedomstvolyq medalimen adamdy qutqarý kezinde kórsetken batyldyǵy úshin 3-sanattaǵy serjant, qurlyq áskerleri áskerı ınstıtýtynyń monsha-kir jýý kombınatynyń bastyǵy Jandos Barlybaev marapattaldy.
Ol byltyr 15 jeltoqsanda túngi saǵat 04.00-de qurlyq áskerleri áskerı ınstıtýtynyń №1 áskerı jataqhananyń kireberisinde bolǵan órt kezinde balalar men áıeldi qutqardy.
Osyndaı nagradaǵa Qazaqstan Respýblıkasy qarýly kúshteriniń desanttyq-shabýyldaý áskerleri men áýe qorǵanysy kúshteriniń birneshe áskerı qyzmetshisi de ıe boldy.
Olardyń qatarynda serjant, 18404 áskerı bóliminiń jóndeý rotasy bólimshesiniń komandıri Erik Qasymbekov te bar.
Serjant 2023 jyldyń 18 qańtara úıde otyrǵan kezde aıqalaǵan daýys estıdi. Syrtqa júgirip shyǵyp qart áıel turatyn páterden órtti baıqaǵan. Áskerı tútinge qaramastan úıge kirip ájeni tilsiz jaýdan qutqardy.
Sondaı-aq, kishi serjant Dáýren Jánibekov 55078 áskerı bóliminiń saqtaý bóliminiń takelaj bólimshesiniń komandıri, qatardaǵy jaýynger Raýan Aqkempirov, 55078 áskerı bólimin saqtaý bóliminiń soldaty (takelajnık), qatardaǵy jaýynger Naýryz Qarabekov, 55078 áskerı bólimin materıaldyq-tehnıkalyq qamtamasyz etý rotasynyń mamany (slesar-motorıst), qatardaǵy jaýynger Іlııas Nızambek maman (júrgizýshi) 55078 áskerı bólimdi saqtaý bóliminiń sarbazy, qatardaǵy jaýynger Álibek Shadetov 55078 áskerı bólimdi saqtaý bóliminiń soldaty (takelajnık) marapattaldy.
Atalǵan áskerı qyzmetshiler 2023 jylǵy 20 qańtarda Jetisý oblysy Qaratal aýdanynyń Úshtóbe eldi mekenindegi 55078 áskerı bóliminde túski asqa barap jatyp jeke sektordaǵy turǵyn úıdiń órtenip jatqanyn baıqaıdy. Olar ómirin qaterge tigip, erli-zaıypty jáne olardyń eki balasyn órt ortasynan alyp shyqty. Sondaı-aq, áskerıler órtke sebep bolǵan gaz ballonyn syrtqa shyǵaryp, órtti sóndirýge qatysty.
