30 jyl jóndelmegen Qostanaı áýejaıynyń ushý-qoný jolaǵyna qarjy bólindi
QOSTANAI. QazAqparat - Qostanaıdaǵy halyqaralyq áýejaıdyń ushý-qoný jolaǵyn qaıta jóndeý úshin oblystyq bıýdjetten 200 mln teńge bólindi. Bul týraly Arhımed Muhambetov oblystyq máslıhattyń kezekti sessııasynda málim etti, dep habarlaıdy QazAqparat.
Qostanaıdyń halyqaralyq áýejaıy 1964 jyly paıdalanýǵa berilgen. Onda áýejaı kesheni, aerovokzal, aerodrom, avıatehnıkalyq baza, jerústi tehnıkasy jáne qajetti basqa da jabdyqtar qamtylǵan. Al ushý-qoný jolaǵy 30 jyl boıy jóndeý kórmegen.
«Rasyn aıtý kerek, áýe tasymaldaýshylarynyń kóbi Qostanaıǵa reıs ashqysy kelmeıdi. Biz byltyr «Máskeý-Qostanaı» reısin ashý úshin «Aeroflotty» áreń kóndirdik. Endi ushý-qoný jolaǵy qaıta jóndeýden ótken soń basqa baǵyttarǵa shyǵýǵa múmkindik alamyz. Jóndeý jumystary kelesi jyly aıaqtalýy tıis», - dedi oblys basshysy.
Jalpy, áýejaıdyń ushý-qoný jolaǵyn qaıta jóndeý úshin 8 mlrd 600 mln teńge qajet. Onyń 200 mln teńgesi oblystyq bıýdjetten bólinse, qalǵan qarjyny QR Investıtsııalar jáne damý mınıstrligi beredi.
