30 jyl ishinde Qazaqstan aıtarlyqtaı áleýmettik jáne ekonomıkalyq jetistikterge jetti – Elbasy
Qazaqstannyń Tuńǵysh Prezıdenti mereıtoılyq sezde sóılegen sózinde «Nur Otan» partııasy elimizdegi eń basty saıası kúsh ekenin atap ótti.
Partııa Tóraǵasy elimizdiń táýelsizdik jyldaryndaǵy negizgi jetistikterine toqtaldy.
«30 jyl ishinde Qazaqstan aıtarlyqtaı áleýmettik jáne ekonomıkalyq jetistikterge jetti. Buǵan, eń aldymen, naryqtyq ekonomıkaǵa kóshýdiń jáne eldi jańǵyrtýǵa baǵyttalǵan túbegeıli reformalardy júzege asyrýdyń nátıjesinde qol jetkizdik. Naryqtyq reformalar, ındýstrııalandyrý jáne shetelden kelgen ınvestıtsııa ónimdilikti arttyrýǵa qozǵaýshy kúsh boldy. Sondaı-aq, ekonomıkalyq ósimdi qamtamasyz etip, jańa jumys oryndaryn ashýǵa jáne qoǵamnyń áleýmettik bólinisin azaıtýǵa múmkindik berdi», – dedi Elbasy.
Nursultan Nazarbaev Qazaqstannyń táýelsizdik jyldarynda etnıkalyq ártúrlilikti artyqshylyqqa aınaldyryp, óziniń ulttyq biregeı standartyn qalyptastyrǵanyn atap ótti. Osy úderistegi negizgi ról, Elbasy atap ótkendeı, Qazaqstan halqy Assambleıasyna júktelgen.
«Ekonomıkalyq ósim joǵary bolǵan kezeńde qurylǵan Ulttyq qor qarjy salasyndaǵy «qaýipsizdik qalqanymyzǵa» aınaldy. Biz 1400 jańa aýrýhana men emhana, 1800 mektep jáne 900 balabaqsha salý arqyly áleýmettik ınfraqurylymdy jańarttyq. «Qazaqstan – 2050» strategııasy aıasynda Ekonomıkalyq yntymaqtastyq jáne damý uıymy elderiniń standarttaryn basshylyqqa alyp otyr», – dedi Qazaqstannyń Tuńǵysh Prezıdenti.
Elbasy «Nur Otan» partııasynyń pandemııa kezindegi jumysyna, sondaı-aq partııany qaıta jańǵyrtý úderisine toqtaldy.
«Bizdiń partııa – basqarý isinde tájirıbesi mol jáne barlyq óńirde kadrlyq áleýeti zor eń iri saıası kúsh. Quramynyń sapasy boıynsha «Nur Otan» búkil Qazaqstan qoǵamynyń keskinin kórsetedi. Sondyqtan biz aldaǵy ýaqytta da memleketimizdiń jáne barsha jurtymyzdyń ál-aýqatyn arttyrý úshin eńbek etýge nıettimiz», – dedi Qazaqstannyń Tuńǵysh Prezıdenti.
Nursultan Nazarbaev partııanyń árdaıym negizgi úsh qaǵıdany basshylyqqa alǵanyn jáne aldaǵy ýaqytta da sony ustanatyndyǵyn atap ótti. Bul – jaýapkershilik, judyryqtaı jumylý, ortaq murat-maqsattarǵa adaldyq.
«Búgin jarııalanyp otyrǵan «Nur Otan» partııasynyń baǵdarlamasy – qarjylyq, adamı jáne basqa da resýrstarmen qamtamasyz etilgen jáne jan-jaqty tarazylanǵan órshil maqsattar men mindetter. Baǵdarlama – qolǵa alǵan reformalarymyzdyń zańdy jalǵasy. Men Táýelsizdik jyldary árdaıym naqty maqsattar belgiledim. Solarǵa jetý úshin túrli qıyndyqty jeńip, aıanbaı ter tógý kerek dep aıtyp kelemin», – dedi «Nur Otan» partııasynyń Tóraǵasy.
Elbasy partııanyń reforma júrgizý tájirıbesi mol jáne barlyq josparlardy júzege asyrýǵa saıası erik-jigeri jetkilikti ekenin basa aıtty.
«Partııanyń jańa baǵdarlamasy oryndalady. Bul qujat eldi odan ári jańǵyrtýǵa jáne barlyq qazaqstandyqtardyń turmys sapasyn jaqsartýǵa jol ashady. Saılaý naýqanyn oıdaǵydaı ótkizý úshin partııa respýblıkalyq jáne aımaqtyq shtabtardyń jumysyn úılesimdi uıymdastyrý qajet. Kandıdattar, belsendiler, senimdi ókilder barlyq aımaqtardy aralap, ár saılaýshyǵa jetýi kerek», – dedi Qazaqstannyń Tuńǵysh Prezıdenti.
Nursultan Nazarbaev Respýblıkalyq saılaýaldy shtabtyń jetekshisi bolýǵa partııa Tóraǵasynyń birinshi orynbasary Baýyrjan Baıbektiń kandıdatýrasyn usyndy.
Sóz sońynda partııa Tóraǵasy eldiń táýelsizdigi men tutastyǵyn saqtap, halyqty Prezıdent Qasym-Jomart Toqaevtyń aınalasyna toptastyrý jáne memleketimizdi odan ári órkendetý úshin eńbek ete beretinin aıtty.
Sezd qorytyndysy boıynsha «Ózgerister joly: Ár azamatqa laıyqty ómir!» atty partııanyń saılaýaldy baǵdarlamasy qabyldandy. Sonymen qatar Parlament Májilisine saılaýǵa qatysý úshin partııanyń 126 múshesinen turatyn partııalyq tizim bekitildi.
