30 jyldyń ishinde EKU arqyly 40 myńǵa jýyq bala dúnıege keldi — DSM
ASTANA. KAZINFORM — Astanada «Bedeýlikti emdeýdiń zamanaýı tásilderi. QRT: búgini men bolashaǵy» taqyrybyndaǵy Qazaqstannyń reprodýktıvtik medıtsına qaýymdastyǵynyń XVII Halyqaralyq kongresi ashyldy. Bul týraly vedomstvonyń baspasóz qyzmeti málim etti.
Densaýlyq saqtaý vıtse-mınıstri Tımýr Sultanǵazıev halyqtyń reprodýktıvtik densaýlyǵyn saqtaý men nyǵaıtý memlekettik saıasattyń basym baǵyttarynyń biri ekenin atap ótti.
— Ult saýlyǵy analardyń densaýlyǵy men ómir sapasymen tikeleı baılanysty. Bedeýlik máselesin sheshý — árbir azamattyń otbasy qurý quqyǵyn júzege asyrýdyń mańyzdy bóligi,— dedi Densaýlyq saqtaý vıtse-mınıstri.
Tımýr Sultanǵazıevtiń aıtýynsha, sońǵy onjyldyqtarda Qazaqstan reprodýktıvtik medıtsına salasynda eleýli jetistikterge jetti. Elde qosalqy reprodýktıvtik tehnologııalar dáýiri 1995 jyly bastalyp, osy ýaqytqa deıin EKU baǵdarlamalarynyń arqasynda shamamen 40 myń bala dúnıege kelgen.
Búgingi tańda Qazaqstanda 32 EKU ortalyǵy jumys isteıdi, olardyń 19-y mindetti áleýmettik medıtsınalyq saqtandyrý júıesiniń sheńberinde qyzmet kórsetedi, sonyń ishinde úsh memlekettik ortalyq bar — Ana men bala ulttyq ǵylymı ortalyǵy, Akýsherlik, gınekologııa jáne perınatologııa ulttyq ǵylymı ortalyǵy, sondaı-aq Aqtóbe oblystyq perınataldyq ortalyǵy.
2021 jyldan beri Memleket basshysynyń bastamasymen júzege asyrylyp kele jatqan «Ańsaǵan sábı» memlekettik baǵdarlamasynyń sheńberinde 11 myńnan astam bala ómirge keldi.
— Bizdiń klınıkalar Ortalyq Azııa elderiniń mamandary úshin tájirıbe mektebine aınaldy. Qazaqstandyq reprodýktologtardyń jetistikteri elimizdiń sheginen tys jerlerde de keńinen tanymal,— dedi Tımýr Sultanǵazıev.
Vıtse-mınıstrdiń aıtýynsha, Qazaqstan búginde qosalqy reprodýktıvtik tehnologııalardy (QRT) qoldaný tájirıbesi eń damyǵan elderdiń qatarynda.
— Bedeýlik — tek medıtsınalyq emes, sonymen qatar áleýmettik másele. Ol kóptegen otbasylardyń taǵdyryna áser etedi. Biz reprodýktıvtik densaýlyqty nyǵaıtý jáne salany damytý baǵytyndaǵy júıeli jumysty jalǵastyramyz,— dep atap ótti ol.
Tımýr Sultanǵazıev otandyq jáne sheteldik mamandarǵa salanyń damýyna qosqan úlesteri úshin alǵys aıtyp, kongress kásibı tájirıbe almasý men Qazaqstandaǵy reprodýktıvtik medıtsınanyń odan ári ósýine jańa serpin beretinine senim bildirdi.
Osy kúnderi Almatyda ótip jatqan Qazaqstannyń reprodýktıvtik medıtsına qaýymdastyǵynyń (QRMQ) XVII Halyqaralyq kongresi — Ortalyq Azııadaǵy eń iri sharalardyń biri. Kongress reprodýktıvtik densaýlyq, erler men áıelderdiń bedeýligi, qosalqy reprodýktıvtik tehnologııalardy (QRT) qoldaný, júktilikti qadaǵalaý, sondaı-aq reprodýktıvtik medıtsınanyń quqyqtyq jáne etıkalyq aspektilerine arnalǵan.
Bıylǵy kongress Qazaqstandaǵy QRT engizilýiniń 30 jyldyǵyna oraı uıymdastyryldy. Forýmǵa Qazaqstannan jáne álemniń 25-ten astam elinen 1000-nan astam maman qatysýda, olardyń qatarynda Aýstralııa, Ázerbaıjan, Argentına, Armenııa, Belarýs, Brazılııa, Ulybrıtanııa, Germanııa, Grýzııa, Izraıl, Úndistan, Irlandııa, Italııa, Qytaı, Qyrǵyzstan, Frantsııa, Pákistan, Serbııa, Tájikstan, Túrkııa, Chehııa, Reseı, AQSh, Ózbekstan jáne Japonııa elderiniń ókilderi bar.
Eske sala keteıik, buǵan deıin Qazaqstandaǵy alǵashqy «qutydan shyqqan bala» avtory, óz salasynyń úzdigi, Saltanat Baıqoshqarova bir donordan on baladan artyq týýǵa bolmaıtynyn aıtqan edi.