30 jyldyq tarıhy bar Stýdentter saraıy nege qıratylyp jatyr
ALMATY. KAZINFORM — Áleýmettik jeliler men BAQ-ta ál-Farabı atyndaǵy qazaq ulttyq ýnıversıteti aýmaǵynda ornalasqan Ómirbek Joldasbekov atyndaǵy Stýdentter saraıynyń buzylyp jatqany týraly aqparat qyzý talqylanyp jatyr. Kópshilik oqý ornynyń mádenı ortalyǵy sanalǵan bul ǵımarattyń ne úshin tas-talqanyn shyǵaryp tastaǵanyn túsinbeı dal.
Joldasbekov atyndaǵy Stýdentter saraıy 1998 jyly qańtarda ashylǵan. Munda jyl saıyn ǵylymı konferentsııalar, kontsertter, festıvalder men ýnıversıtettiń negizgi merekelik sharalary ótetin.
Sondyqtan onyń qazirgi kúıi qoǵamda alańdaýshylyq týdyrdy. Alaıda ýnıversıtet ákimshiligi ǵımarat tek qaýipsiz ári zamanaýı formatta qaıta jańǵyrtylatynyn aıtyp otyr.
QazUÝ qurylysty jobalaý basqarmasynyń basshysy Ersultan Shalqardyń aıtýynsha, Stýdentter saraıyn qaıta jańǵyrtý májbúrli sheshim bolǵan. Sebebi 30 jyl boıy jóndeý kórmegen, tireýish qurylymdary zaqymdanǵan ǵımarat qaýipsizdik talabyna saı kelmeıdi.
Onyń aıtýyna qaraǵanda, ǵımarat paıdalanýǵa berilgeli kúrdeli jóndeýden ótpegen, tipti qurylysy kezinde óreskel qateler jiberilgen.
Qazir nysannyń tehnıkalyq jaǵdaıy aıtarlyqtaı nasharlaǵan.
— Bul ǵımarattyń alǵashqy jobalyq-smetalyq qujattary da joq. Ótinish berip, alǵashqy qujattaryn alǵymyz kelgen, biraq qurylys jumystary keńes dáýirinde bastalǵandyqtan, bul qujattar qala arhıvinde saqtalmaǵan, — deıdi ol.
Onyń sózinshe, 2023 jyly akkredıttelgen uıym saraıdyń ınjenerlik jáne qurylymdyq jaǵdaıyna saraptama júrgizip, tireýish jáne qorshaý konstrýktsııalarynda qaýipti aqaýlardy anyqtaǵan.
— Jekelegen temirbeton belarqalar men qabyrǵalardyń bolmaýy, tireýish kolonnalardyń tot basýy men qısaıýy, túıisý bólikteriniń buzylýy, shatyr men jylý oqshaýlaý qabattarynyń zaqymdanýy baıqaldy. Aqaýlardyń basym bóligi árleý qabattarynyń astynda jasyrynyp jatyr, — deıdi ol.
Júrgizilgen demontaj jáne ınjenerlik zertteý kezinde Stýdentter saraıynyń birneshe bóligi apatty jaǵdaıda ekeni anyqtalǵan.
Ýnıversıtettiń tehnıkalyq esebinde kelesideı derekter keltirilgen:
- Birinshi qabattaǵy kórermen zalyna kireberis (ońtústik-batys bólik) — tireýshi belarqa joq;
- Birinshi qabattaǵy baspaldaq alańy (ońtústik-shyǵys bólik) — tireýshi belarqa joq;
- Birinshi qabattyń ortalyq holy — qurama temirbeton kolonnalarynyń túıisý bólikteri qısaıǵan, metall bólshekterdiń tot basqan;
- Negizgi kireberis (rektorat ǵımaratyna qarsy bet) — tireýshi belarqa joq;
Buǵan qosa, 2024 jylǵy qańtardaǵy Almatydaǵy jer silkinisteri ǵımarattyń jaǵdaıyn odan ári nasharlatqan.
Qoldanystaǵy qurylys normalary boıynsha, iri qoǵamdyq ǵımarattarǵa kúrdeli jóndeý ár 20-25 jyl saıyn júrgizilýge tıis. Alaıda Stýdentter saraıy mundaı jóndeýden múlde ótpegen.
Osylaısha anyqtalǵan aqaýlar men seısmıkalyq qaýipti eskere kele ǵımarattyń sáýlettik kelbetin saqtaı otyryp, konstrýktsııalyq beriktigin arttyrý maqsatynda qaıta jańǵyrtý jóninde sheshim qabyldanǵan.
Ázirshe QazUÝ ókilderi qaıta jańǵyrtý jobasynyń qashan bastalyp, qashan aıaqtalatynyn naqty aıta almaı otyr. Jobany bekitý kelesi jyly josparlanǵan, qurylys jumystary sodan keıin ǵana bastalady.
Eske salaıyq, buǵan deıin Májilis depýtaty Baqytjan Bazarbek ál-Farabı atyndaǵy QazUÝ-dyń zańsyz berilip ketken jeri sot sheshimi shyqqanyna qaramastan áli qaıtarylmaǵanyn aıtqan edi.
