30 jyldan keıingi kezdesý: Aqtóbede qart ana balalarymen qaýyshty
ASTANA. KAZINFORM – Aqtóbe oblysynda ýchaskelik polıtsııa ınspektory qart anany 30 jyldan keıin balalarymen qaýyshtyrdy, dep habarlaıdy Polisia.kz.
Aqtóbe oblysy Qarǵaly aýdanynyń Qosestek aýylynda qyzmet etetin ýchaskelik polıtsııa ınspektory, polıtsııa maıory Aıbolat Beknııazdyń adaldyǵy men qaıyrymdylyǵyn jergilikti halyq jaqsy biledi.
Aýyldaǵy árbir turǵyndy tanıtyn tártip saqshysyn aýylǵa kóship kelgen syrqat qarııanyń jaǵdaıy beıjaı qaldyrmaǵan. 72 jastaǵy Lıýdmıla Skrıpnıktiń eshbir jaqyny bolmaǵan, ózimen birge qujattary da joq edi. Qujattaryn qandaı jaǵdaıda joǵaltqanyn da qarııa esine túsire almaǵan.
Ýchaskelik polıtsııa ınspektory Aıbolat Beknııaz qart áıeldiń qujattaryn rásimdeýge kómektesý úshin túrli mekemelerge suraý joldaı bastaǵan. Alǵashynda nátıje bolmaǵanymen, keıin muraǵattan 30 jyldan astam ýaqyt burynǵy qujat tabylǵan.
Qujatta Lıýdmıla Skrıpnıktiń úsh balasy, bir ul, eki qyzy bar ekeni kórsetilgen. Bul derekke qýanǵan polıtseı izdenisti jalǵastyryp, olardyń birin taýyp, baılanysqa shyqqan.
– Telefon tutqasyn kótergen áıel adamnan «Lıýdmıla Skrıpnıkti tanısyz ba?» dep suraǵanymda, ol qatty tolqyp ketti. Óziniń kóp jyl buryn joǵaltqan anasy ekenin aıtty. Mán jaıdy túsindirdim. Ol qarııanyń úsh balasy da aman-saý ekenin, búginde óz otbasylarymen Pavlodar qalasynda turyp jatqanyn, anasyn uzaq ýaqyt boıy izdegenin jetkizdi. Qyzy anasymen dereý sóılestirýdi ótindi, – dedi Aıbolat Beknııaz.
Polıtseı qarııanyń úıine baryp, ony qýanyshty jańalyqqa aldyn ala daıyndap, beınebaılanys arqyly balalarymen sóılestirgen.
Perzentteri polıtsııa qyzmetkerinen qujatsyz anasyn ózderine jetkizýge kómektesýdi suraǵan.
Balalaryna barýǵa asyqqanymen, qarııanyń densaýlyǵy uzaq jolǵa jaramsyz bolǵan. Osyǵan baılanysty ýchaskelik ınspektor aýyl dárigerimen birge ony bir aıǵa jýyq emdegen.
Sáýir aıynda densaýlyǵy jaqsarǵan Lıýdmıla Skrıpnık taksımen Pavlodar qalasyna jóneltilgen.
Qazirgi ýaqytta qarııa balalarymen qaýyshyp, nemereleriniń ortasynda ómir súrip jatyr. Ol ózine kómek kórsetken polıtsııa qyzmetkerine alǵysyn bildirdi.
– Meniń qaıǵyma beıjaı qaramaı, kómek qolyn sozǵan jalǵyz adam Aıbolat boldy. Sońyna deıin birge bolyp, balalarymdy taýyp bergeni úshin alǵysym sheksiz. Osyndaı meıirimdi jandar kóbeıe berse eken, – dedi qarııa.
Balalary da anasymen qaýyshtyrǵan ýchaskelik ınspektorǵa alǵys aıtyp, ony qonaqqa shaqyryp otyr.
Anyqtalǵandaı, osydan 30 jyl buryn Lıýdmıla Skrıpnık aýyr jaǵdaıǵa tap bolyp, balalarynan ajyraǵan. Úsh balasy alys týystarynyń qolynda tárbıelengen. Keıin syrqattanǵan anasy basqa elde ómir súrip, perzentterin esine túsire almaǵandyqtan, olardy izdep taba almaǵan.
– Jalǵyzbasty qarııanyń otbasy tabylǵanyna ózim de qatty qýandym. Taǵdyrdyń talaı synyna tótep berip, búginde árqaısysy óz aldyna otbasy bolǵan qaısar, meıirimdi balalaryn kórip rıza boldym, – dedi Qosestek aýylynyń ýchaskelik ınspektory Aıbolat Muratuly.
Aıta keteıik, byltyr Reseı azamaty araǵa 59 jyl salyp Astanada anasymen qaýyshqanyn jazǵanbyz.
