30 jylda Parlament 3,5 myńǵa jýyq zań qabyldady — Prezıdent
ASTANA. KAZINFORM — Qazaqstan Parlamenti otyz jyldan astam ýaqytta 3,5 myńǵa jýyq zań qabyldap, eldiń quqyqtyq júıesin qalyptastyrý men memlekettilikti nyǵaıtýǵa eleýli úles qosty. Bul týraly Memleket basshysy Qasym-Jomart Toqaev Parlament palatalarynyń sońǵy birlesken otyrysynda aıtty.
— Osydan otyz jyldan astam ýaqyt buryn elimizde tuńǵysh kásibı Parlament quryldy. Múlde jańa ınstıtýtsıonaldyq úlgige kóshken zań shyǵarýshy organ memlekettigimizdi nyǵaıtýǵa eleýli úles qosty, sondaı-aq elimizdiń quqyqtyq negizin qalyptastyrý jáne naryqtyq ekonomıkany ornyqtyrý isinde mańyzdy ról atqardy, — dedi Prezıdent.
Onyń aıtýynsha otyz jyldyń ishinde 3,5 myńǵa jýyq asa qajetti zań qabyldandy. Al árbir onynshy zańǵa depýtattar ózderi bastamashy boldy.
— Zań shyǵarý júıesiniń qaınar bastaýynda búkil halqymyzǵa jáne halyqaralyq qaýymdastyqqa tanymal saıasatkerlerimiz, kórnekti memleket qaıratkerleri, belgili qoǵam qaıratkerleri turdy. Olardyń jemisti eńbegi Parlament tarıhynda óshpes iz qaldyrdy. Qajyrly qyzmet halqymyzdyń jadynda máńgi saqtalyp qalaryna kúmán joq, — dedi Qasym-Jomart Toqaev.
Parlament árdaıym ýaqyt talabyna tez beıimdelip, qoǵam suranysyna laıyqty jaýap bere alatyn jasampaz qurylym boldy.
Memleketimizdiń basty ókildi organy qoǵamnyń túrli salasyndaǵy kásibı mamandardy bir maqsatqa toǵystyrdy. Elimizde saıası jáne zańnamalyq turǵydan sapasy joǵary parlamenttik mádenıet qalyptasty.
— Bul — Qazaqstandy damyǵan el retinde aıqyndaıtyn eń mańyzdy kórsetkishtiń biri. Túptep kelgende, Parlamenttiń árbir shaqyrylymy Qazaqstannyń alǵa qaraı nyq senimmen qadam basýyna zor serpin berdi, basqasha aıtsaq, ultymyzdyń evolıýtsııalyq órleý jolynyń jarqyn úlgisine aınaldy, — dedi Memleket basshysy.
Eske salsaq, bıyl 1 qyrkúıekten bastap jańa Parlament — Quryltaı óz jumysyna kirisedi.
Ata zańnyń 94-babyna sáıkes, Respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady. Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Naqtyraq aıtqanda, jańa Konstıtýtsııanyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi. Birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaýǵa tıis.
