30 izgi is: Almatyda 465 páterge qaýipsizdik qurylǵylary ornatyldy
ASTANA. KAZINFORM — Tótenshe jaǵdaılar mınıstrliginiń qurylǵanyna 30 jyl tolýyna oraı, Almaty qalasynyń TJD «30 izgi is» atty aýqymdy naýqan jarııalady.
Vedomstvonyń baspasóz qyzmeti atap ótkendeı, onyń aıasynda balalardyń terezeden qulaýyn aldyn alý boıynsha profılaktıkalyq baǵdarlama júzege asyrylyp jatyr.
— Qala ákimdiginiń qoldaýymen 1425 terezelerdiń ashylýyn shekteıtin qurylǵylar satyp alynyp, olar muqtaj sanattaǵy — kópbalaly otbasylar men ákimshiliktiń esebinde turǵan áleýmettik osal toptar sanatyna kiretin otbasylarǵa ornatylmaq. Búgingi kúnge deıin bul qurylǵylar 465 páterge tegin ornatyldy, — delingen habarlamada.
Tehnıkalyq sharalardan basqa, aldyn alý sharalarǵa erekshe nazar aýdarylyp keledi:
— turǵyndarǵa qaýipsizdik sharalary týraly eske salatyn aptalyq SMS-habarlamalar jiberiledi;
— mektepter men balabaqshalarda jazǵy demalysqa deıin oqytý sabaqtary men oıyndar ótkizildi;
— halyqpen kezdesýler uıymdastyrylyp, 7000-nan astam aqparattyq paraqsha taratyldy;
— TJD qyzmetkerlerinen «Jyljymaly qaýipsizdik mektebi» qurylyp, túsindirme sabaqtary aıasynda balalar lagerinde 170-ten astam bala oqytyldy.
Qalalyq TJD málimetinshe, naýqannyń maqsaty — árbir balanyń ómiri men densaýlyǵyn saqtaý. Atalǵan jumystar jalǵasyn tabady.
Osydan buryn Almatyda elektrovelosıped ıelerine eskertý jasaldy.