30% ústemeaqy: Qazaqstanda jattyqtyrýshylardyń tabysy artady
ASTANA. KAZINFORM — Qazaqstanda jattyqtyrýshylardyń jalaqysy 30%-ǵa ósedi, dep habarlaıdy Týrızm jáne sport mınıstrliginiń baspasóz qyzmeti.
2026 jyldyń basynda Memleket basshysy «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵan bolatyn.
Zańda biliktilik testileýinen sátti ótken jáne ulttyq daıarlyq standarttaryna sáıkes oqý-jattyǵý protsesin júrgizetin jattyqtyrýshy-oqytýshylarǵa laýazymdyq jalaqysynyń 30%-y mólsherinde qosymsha aqy tóleý kózdelgen.
Qazirgi ýaqytta elimizde 526 balalar men jasóspirimder sport mektebi jumys isteıdi. Bul mekemelerde 15 myńnan astam jattyqtyrýshy-oqytýshy eńbek etedi. Olardyń jetekshiligimen 398 342 bala sportpen shuǵyldanady. Sport mektepterine balalar 5 jastan bastap qabyldanady. Búgingi kúni jyl basynan beri ár óńirdegi sporttyq mekelerdiń 5863 jattyqtyrýshysy biliktilikti arttyrý kýrsynan ótti.
Jospar boıynsha jyl saıyn jattyqtyrýshy-oqytýshylardyń shamamen 30%-dan astamy biliktilik testileýinen ótýde.
— Ony Respýblıkalyq dene shynyqtyrý jáne sport boıynsha oqý-ádistemelik jáne taldaý ortalyǵy uıymdastyrady. Jattyqtyrýshy-oqytýshylarǵa qosymsha aqy tóleýge jergilikti bıýdjetten qarajat bólý máselesin Respýblıkalyq bıýdjet komıssııasy qoldady. Zańda balalar men jasóspirimder sport mektepterin (BJSM) jan basyna shaqqandaǵy normatıvtik qarjylandyrý júıesine kóshirý jáne jattyqtyrýshy-oqytýshylardyń eńbekaqysyn arttyrý sharalary qarastyrylǵan. 2026-2028 jyldarǵa arnalǵan qarjylandyrýdyń jalpy kólemi 74 mlrd teńgeni quraıdy. Onyń 1,8 mlrd teńgesi jattyqtyrýshy-oqytýshylarǵa qosymsha aqy tóleýge baǵyttaldy, — delingen habarlamada.
Qalǵan qarajat sport mektepteriniń materıaldyq-tehnıkalyq bazasyn nyǵaıtýǵa, balalardyń jarystar men oqý-jattyǵý jıyndaryna qatysýyn qamtamasyz etýge, farmakologııalyq qamtamasyz etýge, sondaı-aq sporttyq kıim-keshek pen qajetti jabdyqtardy satyp alýǵa jumsalyp jatyr.
Zańnamalyq ózgerister jattyqtyrýshy mamandyǵynyń bedelin arttyrýǵa, balalar men jasóspirimder sportyna bilikti mamandardy tartýǵa, tájirıbeli jattyqtyrýshylardy salada saqtap qalýǵa jáne bolashaq chempıondardy daıarlaýǵa qolaıly jaǵdaı jasaýǵa baǵyttalǵan.
Buǵan deıin Petropavlda júzý jattyqtyrýshysy esirtki aınalymyna qatysy bar degen kúdikke ilikkenin jazdyq.