30 tonnaǵa jýyq: Astanada qymyz rekordy tirkeldi
ASTANA. KAZINFORM — Qazir Astanada qymyz festıvali ótip jatyr. Gastrofestıvalge el óńirlerinen 30 tonnaǵa jýyq qymyz ákelindi. Eki kún ishinde halyq pen ádilqazy alqasy úzdik qymyzdy anyqtaıdy.
— Búgingi festıval aıasynda qymyz rekordyn jańartyp otyrmyz, osy jerge búkil el aýmaǵynan 30 tonnaǵa jýyq qymyz ákelindi, — dedi «BaiQymyz» ulttyq taǵamdar gastrofestıvali ıdeıasynyń avtory, uıymdastyrýshy Jumajan Qaltaev.
Onyń aıtýynsha, festıvalde úzdik qymyz tórt ádispen tańdalady.
— Aldymen kez kelgen adam qymyzdyń dámin kórip, unaǵan qymyzǵa QR kod arqyly daýys bere alady. Ekinshi ádis úzdik qymyzdy ádilqazylar alqasy baǵalaıdy. Úshinshiden, qymyz óndirýshi óz ónimin tanystyrady, ıaǵnı prezentatsııa jasaıdy. Tórtinshi ádis qymyzǵa laboratorııalyq turǵydan zerttelip, baǵa beriledi, — deıdi ol.
Sondaı-aq uıymdastyrýshy qymyz festıvalin ótkizýdi dástúrge aınaldyrý jospary baryn aıtty.
— Qymyz festıvali — ishki jáne syrtqy týrızmdi damytýǵa yqpal etedi degen úmittemiz, biz sol maqsatty kózdep otyrmyz, — dep túsindirdi Jumajan Qaltaev.
Buǵan deıin habarlaǵanymyzdaı, elordada «BaiQymyz» ulttyq taǵamdar gastrofestıvali ótip jatyr.
Gastrofestıvaldi uıymdastyrýshylar halqymyzdyń dástúrli taǵam mádenıetin, sonyń ishinde qymyz óndirý dástúrin jańǵyrtyp, halyqaralyq deńgeıge ilgeriletý maqsatyn kózdep otyr.
Sondaı-aq qymyz óndirýshiler «Eń úzdik qymyz» ataǵy úshin talasady. Júlde qory — 45 mıllıon teńge (I oryn — 20 mln teńge, II oryn — 15 mln teńge, III oryn — 10 mln teńge).
Baıqaýdyń maqsaty — elimizdegi eń sapaly ári shıpaly qymyzdy anyqtaý.