30 tamyzdaǵy mereke kúni toılana ma — mınıstrlik jaýaby
ASTANA. KAZINFORM — QR Eńbek jáne halyqty áleýmettik qorǵaý vıtse-mınıstri Vıktorııa Shegaı 30 tamyzdaǵy mereke kúni retindegi datanyń kúshi joıylatynyn aıtty.
Búgin Parlament Májilisinde tilshiler vıtse-mınıstrden «el halqy 30 tamyzdaǵy Konstıtýtsııa kúnin atap óte me?» dep surady.
— Endi bul data demalys kúni retinde sanalmaıdy. Sebebi jańa Konstıtýtsııa kúshine engennen bastap 15 naýryz resmı túrde Ata zań kúni retinde sanalady, — dedi Vıktorııa Shegaı.
Eske salsaq, naýryz aıynyń basynda Ádilet mınıstri Erlan Sársembaev elde Konstıtýtsııa kúnin atap ótý datasy qaı jaǵdaıda ózgeretinin túsindirdi.
Atap aıtqanda, respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady.
Al referendýmda Konstıtýtsııa qabyldanǵan kún, ıaǵnı 15 naýryz memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Aıta keteıik, 17 naýryzda Memleket basshysy Qasym-Jomart Toqaev Qazaqstan Respýblıkasynyń Konstıtýtsııasyna jáne «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıdy.
