30 sáýirde aýa raıyna baılanysty eskertý jarııalandy
ASTANA.KAZINFORM - Qazgıdromet 30 sáýirde aýa raıyna baılanysty birqatar óńirde eskertý jarııalady.
Sınoptıkterdiń boljamyna súıensek, Aqtóbe oblysynda kúndiz jańbyr jaýyp, naızaǵaı oınaıdy. Soltústiginde nóser jańbyr, al ortalyǵy men shyǵysynda burshaq pen daýyldy jel bolýy múmkin. Jeldiń jyldamdyǵy 15–18 m/s-qa deıin kúsheıedi. Aqtóbede de kúndiz jańbyr, keıde nóser jańbyr jaýady jáne naızaǵaı oınaıdy.
Jetisý oblysynda jel 15–20 m/s-qa deıin kúsheıedi, Alakól mańynda ekpini 23–28 m/s-qa jetýi múmkin. Oblystyń shyǵysy men ońtústiginde óte joǵary órt qaýpi saqtalady.
Qyzylorda oblysynda kúndiz batysy men soltústiginde naızaǵaı oınap, jańbyr jaýsa, keı jerlerde daýyldy jel bolady. Soltústigi men ortalyǵynda shańdy daýyl bolýy múmkin. Jel 15–20 m/s-qa deıin kúsheıedi. Shyǵysynda joǵary órt qaýpi saqtalady, ortalyǵy men ońtústiginde de órt qaýpi bar. Qyzylorda qalasynda da joǵary órt qaýpi bar.
Qostanaı oblysynda batysy men soltústiginde kúndiz jańbyr men naızaǵaı bolady. Qostanaı qalasynda da jańbyr jaýady, naızaǵaı jarqyldaıdy.
Batys Qazaqstan oblysynda batysynda kúndiz jańbyr men naızaǵaı boljanǵan. Túnde jáne tańerteń soltústigi men shyǵysynda tuman túsedi, keı jerlerde -2°C deıin úsik júrýi múmkin. Oral qalasynda da túnde jáne tańerteń tuman, al topyraq betinde úsik júredi.
Mańǵystaý oblysynda jańbyr, naızaǵaı, ońtústiginde burshaq bolýy múmkin. Túnde jáne tańerteń soltústik-shyǵysynda tuman túsý yqtımal. Jel 15–20 m/s-qa deıin kúsheıedi. Aqtaýda jańbyr men naızaǵaı bolady.
Qaraǵandy oblysynda jeldiń ekpini 15–18 m/s-qa deıin kúsheıedi.
Atyraý oblysynyń shyǵysynda jańbyr jaýady, naızaǵaı oınaıdy. Ońtústik-shyǵysynda joǵary órt qaýpi saqtalady.
Pavlodar oblysynyń soltústiginde joǵary órt qaýpi saqtalady.
Abaı oblysynda jel 15–20 m/s-qa deıin kúsheıedi. Ortalyǵynda jáne ońtústiginde joǵary órt qaýpi saqtalady.
Soltústik Qazaqstan oblysynda túnde jáne tańerteń ońtústiginde tuman túsedi. Jel 15–20 m/s-qa deıin kúsheıedi. Batysynda joǵary órt qaýpi bar.
Túrkistan oblysynyń taýly aımaqtarynda kúndiz ótkinshi jańbyr, naızaǵaı jáne daýyldy jel bolýy múmkin. Jel 15–20 m/s-qa deıin kúsheıedi.
Jambyl oblysynyń taýly aımaqtarynda kúndiz jańbyr jaýady, naızaǵaı oınaıdy. Túnde jáne tańerteń tuman bolady. Jel 15–20 m/s-qa deıin kúsheıedi. Oblystyń ortalyǵynda joǵary órt qaýpi saqtalady.
Aldaǵy ýaqytta jańbyr jaýyp, úsik júretinin jazǵan bolatynbyz.
