30 naýryzda 14 óńirde máslıhattardyń shyǵyp qalǵan depýtattarynyń ornyna saılaý ótedi
ASTANA. QazAqparat - «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq Zańynyń 101-baby 4-tarmaǵyna sáıkes aǵymdaǵy jyldyń 30 naýryzynda respýblıkanyń 14 óńirinde 58 saılaý okrýginde máslıhattardyń shyǵyp qalǵan depýtattarynyń ornyna saılaý ótedi. Bul týraly QR Ortalyq saılaý komıssııasynyń baspasóz qyzmetinen habarlady.
Máslıhattardyń shyǵyp qalǵan depýtattarynyń ornyna saılaýdy oblystyq saılaý komıssııalary taǵaıyndaıdy.
Barlyǵy Astana qalasy máslıhatynyń 1 depýtaty, 6 oblystyq depýtat, 12 qalalyq jáne 39 aýdandyq máslıhattar depýtattary saılanady. «Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes máslıhat depýtattyǵyna kandıdattardy belgilengen tártipte tirkelgen respýblıkalyq nemese jergilikti qoǵamdyq birlestikter, sondaı-aq olardyń qurylymdyq bólimsheleri men azamattar - ózin-ózi usyný jolymen usynady. Máslıhat depýtattyǵyna saılaný úshin azamat Konstıtýtsııasynyń 86-babynyń 3-tarmaǵynda belgilengen talaptaryn qanaǵattandyrýy, sondaı-aq Konstıtýtsııanyń 33-babynyń 2- jáne 3-tarmaqtaryna jáne «Qazaqstan Respýblıkasyndaǵy saılaý týraly» Konstıtýtsııalyq zańyna sáıkes saılaý quqyǵyna ıe bolýy kerek. Osylaısha, 20 jasqa tolǵan Qazaqstan Respýblıkasynyń azamaty máslıhat depýtaty bolyp saılana alady. Sot is-áreketke jaramsyz dep tanyǵan, sondaı-aq sot sheshimi boıynsha bostandyǵynan aıyrý oryndarynda otyrǵan azamattar saılaý jáne saılaný quqyǵyna ıe bola almaıdy. Respýblıkalyq nemese jergilikti qoǵamdyq birlestikterdiń, olardyń qurylymdyq bólimsheleriniń máslıhat depýtattyǵyna kandıdattardy usynýyn olardyń joǵary organdary árbir kandıdat daýysqa túsetin saılaý okrýgin kórsete otyryp júrgizedi. Máslıhat depýtattyǵyna kandıdattardy azamattardyń ózin-ózi tártibimen usynýy tıisti okrýgtik saılaý komıssııasyna osy aýmaqtyq saılaý okrýgi boıynsha máslıhat depýtattyǵyna kandıdat bolyp daýysqa túsý nıeti týraly ótinish berýi arqyly jasalady. 2014 jylǵy 19 aqpandaǵy jaǵdaı boıynsha máslıhat depýtattyǵyna 64 kandıdat usynylǵan, olardyń 32-i - ózin-ózi usynǵandar.
