30 myńnan 450 myń teńgege deıin: Qazaqstan qalalarynda bala kútýshisiniń qyzmeti qansha
ASTANA. KAZINFORM — Elimizde bala kútýshisiniń qyzmeti 30 myń teńgeden bastalyp, 450 myń teńgege deıin jetti. Qyzmet aqysyna jumys kestesi, balanyń sany men jasy, mamannyń tájirıbesi men eńbek ótili, sonymen birge qosymsha júktemeleri áser etedi, dep habarlaıdy Kazinform agenttiginiń tilshisi.
Saǵatyna birneshe myń teńge
Qyzmettiń keń taralǵan túriniń biri — bala kútýshisi. Ár saǵaty sanaýly ári aqyly. Jumysbasty ata-ana úshin balany balabaqshadan alyp ketip, úıge aparý, keshkilik balany qaraý qyzmeti óte qajet. Sonymen birge demalys kúnderi de bala kútýshisiniń kómegine júginedi.
Óńirlerdiń basym bóliginde bala kútýshisi saǵatyna 1-2 myń teńge alady. Mysaly, Pavlodarda saǵatyna 1 000 — 3 500 teńge eseptelgen. Al Oralda 1 000 — 2 500 teńge, Tarazda 1 000 — 5 000 teńge aralyǵynda.
Almatyda bala kútýshisi saǵatyna 2 000 teńge, bilikti mamandar saǵatyna 3 000 — 5 000 teńge alady.
Astanada bala kútýshisiniń qyzmeti saǵatyna 2 000 teńgeden, al bir kúnge 8 000 teńgeden bastalady. Eger bala emshek emse jáne arnaıy kútimdi qajet etse, qyzmet aqysy ósedi. Birneshe balanyń kútimin jasaý kerek bolsa da, aqysy joǵary bolady.
Bala kútýshisiniń aılyq jalaqysy qansha
Bala kútýshisi turaqty jumys istese qyzmet aqysy qoljetimdi bolady. Ashyq habarlandyrýlardaǵy aqparatqa súıensek, Almatyda bala kútýshiniń jalaqysy aıyna 180-300 myń teńge. Keıbiri 150 myń teńge alady. Eger maman tájirıbeli ári bilikti bolsa, jalaqy mólsheri arta túsedi.
Baǵany salystyrý kezinde aı saıynǵy eń tómen qyzmet quny Túrkistanda 30-40 myń teńge aralyǵynda, Semeıde 60 myń teńge, Qaraǵandy men Jezqazǵanda shamamen 80 myń teńge boldy.
Óńirlerde bala kútýshisiniń aı saıynǵy ortasha jalaqysy 100-200 myń teńge bolyp tur. Іri qalalarda bilikti bala kútýshiniń qyzmet aqysy eselenedi. Máselen, Astanadaǵy mamandandyrylǵan agenttiktiń habarlaýynsha, pedagogıkalyq bilimi bar bala kútýshisiniń qyzmeti aıyna 450 myń teńge, al otbasymen birge tursa, 500 myń teńgeden bastalady. Bul kásibı bilikti maman qyzmeti jáne ony qarapaıym habarlandyrýdaǵy usynyspen salystyrýǵa bolmaıdy.
Baǵa qaı qalada joǵary
Qyzmet aqysy Almaty, Astana qalalarynda jáne iri oblys ortalyqtarynda joǵary. Baǵa tek qalaǵa qaraı ózgermeıdi.
Ana sútin emetin sábı, birneshe bala, pedagogıkalyq jáne medıtsınalyq bilim, shet tilin bilý, túnde de bala qaraýǵa kómektesý, balany mektepke, úıirmelerge tasý. Munyń bári baǵaǵa áser etedi.
Mysaly, Almatyda ana sútin emetin sábıge medıtsınalyq bilimi bar maman qajet bolsa aıyna 200-400 myń teńge tóleıdi. Pedagogıkalyq bilimi bar maman 1-3 jastaǵy balany baǵyp berse aıyna 150-300 myń teńge alady.
Baǵa aıyrmashylyǵy nege joǵary
Baǵa bir ǵana qyzmet túrine qaraı ózgermeıdi. Oǵan qosymsha mindetter áser etedi. Sonyń ishinde balanyń jasy, bala sany, jumys ýaqytynyń uzaqtyǵy, pedagogıkalyq jáne medıtsınalyq biliktiligi, tájirıbesi kiredi. Qosymsha mindettemeler júktese, túnde de jumysqa tartsa, sol otbasymen birge tursa baǵa ózgeredi.
Sondyqtan aldyn ala kelisip, jumys kestesin, mindetterdi bekitip alǵan durys. Máselen bala kútýshisi tek birneshe saǵat boıy bala baǵyp beredi, al pedagogıkalyq bilimi bar maman kúni boıy balany damytýmen aınalysady. Ekeýiniń qyzmet aqysy eki túrli bolady.
Baǵany salystyrǵan kezde ashyq derekkózderge súıendik jáne qyzmet aqysynda aıyrmashylyq bolýy múmkin.
Ata-analar úshin bala kútýshisiniń qyzmet aqysy ǵana emes, qyzmet túrine ne kiretini de mańyzdy.
Buǵan deıin Qazaqstandaǵy notarıýs qyzmetteriniń quny týraly jazyldy.
