30 myńǵa jýyq sheteldik Qazaqstan azamattyǵyn jeńildetilgen tártippen alǵan
ASTANA. KAZINFORM - Qazaqstan azamattyǵyn alý úshin barlyq sheteldiktiń el aýmaǵynda bes jyl turýy mindetti emes. Qoldanystaǵy zańnamaǵa sáıkes, birqatar sanattaǵy adamdar azamattyqty jeńildetilgen tártippen rásimdeı alady. Bul týraly Іshki ister mınıstrligi Kazinform agenttigine bergen jaýabynda jazdy.
Azamattyq alýdyń mundaı tártibi eń aldymen Qazaqstanmen tarıhı, etnıkalyq nemese otbasylyq baılanysy bar adamdarǵa qarastyrylǵan.
Atap aıtqanda, «Qazaqstan Respýblıkasynyń azamattyǵy týraly» zańnyń 16-1-babyna sáıkes, jeńildetilgen rásimge:
• qandastar,
• jappaı saıası qýǵyn-súrgin qurbandary men olardyń urpaqtary,
• Qazaqstanda JOO-da bilim alyp júrgen etnıkalyq qazaqtar,
• Qazaqstan azamatymen nekede turǵan sheteldikter nemese Qazaqstan azamattarynyń jesirleri,
• Qazaqstan, Reseı, Belarýs jáne Qyrǵyzstan arasyndaǵy memleketaralyq kelisimderge sáıkes, osy elderdiń azamattary quqyly.
Bul rette QR ІІM sheteldikterdiń Qazaqstan mádenıetin nasıhattaý, sondaı-aq memlekettik nagradalarǵa, alǵys hattar nemese syılyqtarǵa ıe bolý azamattyqty jeńildetilgen tártippen alýǵa negiz bolmaıtynyn atap ótti.
– 2025-2026 jyldary Qazaqstan azamattyǵyn jeńildetilgen tártippen 29,8 myń shetel azamaty aldy. Onyń ishinde 24,8 myńy – etnıkalyq qazaqtar. Atap aıtqanda, 2025 jyly – 20,6 myń, al 2026 jyly 9,2 myń adam azamattyqqa qabyldanǵan, – dep jazylǵan QR ІІM agenttikke bergen jaýabynda.
Vedomstvonyń habarlaýynsha, azamattyq alýǵa ótinish berýshiniń Qazaqstanda turaqty turý merzimi turaqty turýǵa ruqsat berilgen kúnnen bastap esepteledi. Bul málimetter Іshki ister mınıstrliginiń aqparattyq júıeleri arqyly tekseriledi.
Sondaı-aq mınıstrlik Qazaqstan azamattyǵyna qabyldaý týraly sheshimderdi qaıta qaraý máselesine túsinikteme berdi. Zańǵa sáıkes, azamattyqqa qabyldaý týraly sheshimdi Prezıdent qabyldaıdy. Sondyqtan mundaı sheshimdi qaıta qaraý da Memleket basshysynyń quzyretine jatady.
Aıta keteıik, sońǵy 8 jylda Qazaqstan azamattyǵynan shyǵýǵa ótinish bergender sany 40 esege jýyq azaıǵan.
Abaı oblysynda tórt shetel azamaty Qazaqstan azamattyǵyn aldy.
