30 myń jalǵan ekpe: Aýyl sharýashylyǵy mınıstri saladaǵy kemshilikterdi moıyndady

ASTANA. KAZINFORM — QR Aýyl sharýashylyǵy mınıstri Aıdarbek Saparov Úkimet otyrysynan keıingi brıfıngte veterınarııa salasyndaǵy baqylaý máselelerine qatysty pikir bildirdi.

Eske salaıyq, buǵan deıin Memleket basshysy sońǵy úsh jyl ishinde malǵa vaktsına egildi dep kórsetilgen 30 myń jalǵan qujattyń jasalǵanyn aıtyp, veterınarııalyq qyzmettiń baqylaýy álsiz ekenin synǵa alǵan bolatyn. 

Mınıstrdiń aıtýynsha, saladaǵy túıtkilder rasymen bar, alaıda olardy qysqa merzimde tolyq sheshý múmkin emes. Ol baqylaýdy kúsheıtý qajettigi buryn da kóterilgenin atap ótti.

— Prezıdent durys aıtty. Mundaı máseleler bar. Biraq bul bir kúnde sheshilmeıdi. Men bir jyl buryn baqylaýdy kúsheıtý kerektigin aıttym. Bul — jergilikti jerdegi veterınarlar men ákimdikterdiń quzyryndaǵy jumys. Bizdiń komıtet ınspektsııalyq baqylaý júrgizedi. Másele Jambyl oblysynda anyqtalyp, úlken rezonans týdyrdy. Vaktsına ýaqytynda salynbaǵan jaǵdaılar belgili boldy. Keı óńirlerde maman tapshylyǵy bar. Mal sany bir jerde kóp, bir jerde az, — dedi Aıdarbek Saparov.

Mınıstr Prezıdenttiń tapsyrmasymen veterınarııa salasyn jetildirýge baǵyttalǵan keshendi sharalar ázirlenip jatqanyn jáne arnaıy jumys toby qurylǵanyn aıtty. Sondaı-aq ol jalǵan qujattarǵa qatysty jaýapkershilik máselesine toqtaldy.

— Іs qozǵalǵan jaǵdaılar bar. Tártiptik jazaǵa tartylǵandar bar. Qylmystyq ister de tirkeldi, — dedi mınıstr.

Buǵan deıin Májilis depýtattary agrarlyq mamandyq stýdentteriniń shákirtaqysyn kóterýdi usynǵan edi.