30 myń malǵa qaǵaz júzinde ǵana ekpe salynǵan – Úkimettiń keńeıtilgen otyrysy

ASTANA. KAZINFORM – Prezıdent Qasym-Jomart Toqaev Úkimettiń keńeıtilgen otyrysynda mal sharýashylyǵyn sýbsıdııalaýdyń kóleńkeli tustary tolyq seıilmegenin synady.

- Sharýalardy memlekettik qoldaý júıesi barynsha ashyq bolýy kerek. Qazir bul júıeniń kúmándi, kóleńkeli tustary kóp. Úkimet jyl sońyna deıin aqparattyq júıelerdi kiriktirý jumysyn aıaqtaýǵa tıis. Bul qadam sýbsıdııalaý úderisin tsıfrlandyryp, sharýalardyń mindettemelerin baqylaýǵa alýǵa múmkindik beredi, - dedi qasym-Jomart Toqaev.

Prezıdent mal sharýashylyǵyn turaqty damytý úshin veterınarlyq qaýipsizdik júıeli jumys isteý kerektigin atap ótti.

- Ashyǵyn aıtqanda, Qazaqstanda bul sala kenjelep tur. Elimizdegi 168 zerthananyń jıyrma jetisi ǵana halyqaralyq standartqa saı keledi. Mal dárigerleriniń jumysy tolyq baqylaýǵa alynbaǵan. Sońǵy úsh jylda malǵa ekpe saldyq dep 30 myń jalǵan qujat jasaldy. Bul salany birjola tártipke keltirý qajet. Úkimet veterınarııa salasyn damytýdyń keshendi baǵdarlamasyn úsh aıdyń ishinde qabyldaýǵa tıis, - dedi Memleket basshysy.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.