30 kúndik bitimgerlikke aıyrbas retinde Reseı AQSh pen EO-ǵa talaptar qoıdy

ASTANA. KAZINFORM — Atysty 30 kún toqtatý úshin Reseı AQSh pen EO-dan Ýkraınaǵa qarý-jaraq jetkizýdi toqtatýdy talap etip otyr, dep habarlaıdy DW aqparat agenttigi. 

Kremldiń baspasóz hatshysy Dmıtrıı Peskov amerıkalyq ABC telearnasyna málimdegendeı, Vladımır Pýtın eger Kıevtiń odaqtastary ony qarý-jaraqpen qamtamasyz ete berse, Ýkraına usynǵan uzaqqa sozylǵan atysty toqtatý ıdeıasyn joqqa shyǵarady.

— Bul Ýkraına úshin artyqshylyq bolady. Ýkraına tolyq jumyldyrýdy jalǵastyryp, maıdan shebine jańa áskerin jiberedi. Ol bul ýaqytty jańa áskerin jattyqtyrý jáne qazirdiń ózinde soǵysyp jatqandarǵa demalý úshin paıdalanady. Endeshe, biz nelikten Ýkraınaǵa mundaı artyqshylyq berýimiz kerek? — dep surady Peskov.

Pýtınniń baspasóz hatshysy bir kún buryn mundaı bitimge kelý múmkindigin moıyndady, biraq «nıýanstar eskerilýi tıis» ekenin atap ótti. 9 mamyr kúni keshke ol AQSh prezıdenti Donald Tramp alǵash ret usynǵan kezde Kreml uzaq merzimdi atysty toqtatý bastamasyn qoldaǵanyn atap ótti.

Ýkraına prezıdenti Vladımır Zelenskıı 7 mamyrda sóılegen sózinde Kıevtiń Reseımen atysty keminde 30 kúnge toqtatý týraly usynysy kúshinde ekenin málimdedi. 

— Biz dıplomatııaǵa múmkindik beretin bul usynysty qaıtarmaımyz, — dedi ol.

Buǵan deıin Ulybrıtanııa, Frantsııa, Germanııa jáne Polsha basshylary 10 mamyrda Kıevke baratyny týraly jazǵan bolatynbyz.