30 keli mefedron, 2,2 tonna prekýrsor: QR UQK esirtki laboratorııasyn anyqtady

ASTANA. QazAqparat – Ulttyq qaýipsizdik komıteti Qyrǵyzstan Respýblıkasynyń Іshki ister mınıstrligimen ózara árekettese otyryp, TMD elderiniń aýmaǵynda taralyp kelgen psıhotroptyq zattardyń iri óndirisin joıý boıynsha operatsııany iske asyrdy. QazAqparat bul týraly QR UQK-niń baspasóz qyzmetine silteme jasap habarlaıdy.

«UQK jedel qyzmetkerleri zerdeleý barysynda Qyrǵyzstan Respýblıkasyndaǵy iri esirtki laboratorııasynyń jumysy týraly aqparatqa qol jetkizdi. Halyqaralyq ózara árekettestik aıasynda jedel aqparat áriptesterge joldandy.

Nátıjesinde 2023 jylǵy 26 shildede Qyrǵyzstannyń Іshki ister mınıstrligi Bishkek qalasynyń mańynda sıntetıkalyq esirtkiniń daıyn partııasyn tasymaldaý ústinde jergilikti esirtki qylmysyna qatysy bar toptyń basshysyn jáne onyń eki kómekshisin qolǵa túsirdi.

Tintý kezinde 30 keli mefedron, 2,2 tonna prekýrsorlar, sonymen qatar esirtki óndiretin qurylǵy tabylyp, tárkilendi», - delingen UQK habarlamasynda.

Málim etilgendeı, shet elderdiń quzyretti organdarymen ózara árekettese otyryp, halyqaralyq esirtki trafıgi arnalaryn anyqtaý men olardyń jolyn kesý jumysy jalǵasyp jatyr.