30 qazanda elimizde máslıhattardyń shyǵyp qalǵan depýtattarynyń ornyna saılaý ótedi
«Qazaqstan Respýblıkasyndaǵy saılaý týraly» Zańnyń 101-baby 4-tarmaǵyna sáıkes aǵymdaǵy jylǵy 30 qazanda respýblıkanyń 10 óńirinde 31 saılaý okrýginde máslıhattardyń shyǵyp qalǵan depýtattarynyń ornyna saılaý ótedi.
Máslıhattardyń shyǵyp qalǵan depýtattarynyń ornyna saılaýdy oblystyq saılaý komıssııalary taǵaıyndaıdy.
Saılaý zańnamasyna saı QR OSK osy saılaýdy uıymdastyrý men ótkizý kezinde aýmaqtyq saılaý komıssııalaryna ádistemelik basshylyqty, sondaı-aq olardyń qyzmetiniń saılaý týraly zańnyń talaptaryna sáıkes kelýin baqylaýdy júzege asyrady.
Qazirgi sátte barlyq tartylǵan saılaý komıssııalary qajetti materıaldyq-tehnıkalyq jáne qarjylyq resýrstarmen qamtamasyz etilgen jáne jumys isteýge daıyn.
Barlyǵy 4 oblystyq, 11 qalalyq jáne 16 aýdandyq máslıhat depýtattary saılanatyn bolady.
«Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes máslıhat depýtattyǵyna kandıdattardy belgilengen tártipte tirkelgen respýblıkalyq nemese jergilikti qoǵamdyq birlestikter, sondaı-aq olardyń qurylymdyq bólimsheleri men azamattar - ózin-ózi usyný jolymen usynady.
Máslıhat depýtattyǵyna saılaný úshin azamat Konstıtýtsııanyń 86-babynyń
3-tarmaǵynda belgilengen talaptarǵa sáıkes kelýi, sondaı-aq Konstıtýtsııanyń 33-babynyń 2 jáne 3-tarmaqtaryna jáne «Qazaqstan Respýblıkasyndaǵy saılaý týraly» Konstıtýtsııalyq zańyna sáıkes saılaý quqyǵyna ıe bolýy tıis.
Osylaısha, 20 jasqa tolǵan Qazaqstan Respýblıkasynyń azamaty máslıhat depýtaty bolyp saılana alady. Sot is-áreketke qabiletsiz dep tanyǵan, sondaı-aq sot úkimimen bas bostandyǵynan aıyrý oryndarynda otyrǵan azamattar saılaý jáne saılaný quqyǵyna ıe bola almaıdy.
Respýblıkalyq nemese jergilikti qoǵamdyq birlestikterdiń, olardyń qurylymdyq bólimsheleriniń máslıhat depýtattyǵyna kandıdattar usynýyn, árbir kandıdattyń daýysqa túsetin saılaý okrýgin kórsete otyryp, olardyń joǵary organdary júrgizedi.
Máslıhat depýtattyǵyna kandıdattardy azamattardyń ózin-ózi tártibimen usynýy tıisti okrýgtik saılaý komıssııasyna osy aýmaqtyq saılaý okrýgi boıynsha máslıhat depýtattyǵyna kandıdat bolyp daýysqa túsý nıeti týraly ótinish berýi arqyly jasalady.
