30 qazan. Kazinform kúntizbesi. Tulǵalar týǵan kún

Jabal ERǴALIEV, jýrnalıst, pýblıtsıst, jazýshy-dramatýrg, qoǵam qaıratkeri 

1955 jyly Aqmola oblysy Chkalov aýdanyndaǵy Qaraǵash aýylynda dúnıege kelgen. S. M. Kırov atyndaǵy Qazaq memlekettik ýnıversıtetin bitirgen.

Eńbek joly: 1973-1997 jyldary «Kókshetaý pravdasy» gazetinde kishi ádebı qyzmetker, tilshi, bas redaktordyń orynbasary qyzmetin atqardy. 1973-2005 jyldary «Kókshetaý» qalalyq gazetiniń bas redaktory, 2005-2011 jyldary Aqmola oblystyq «Arqa ajary» gazetiniń bas redaktory, 2007-2011 jyldary Aqmola oblystyq máslıhatynyń depýtaty, 2013 jyly Aqmola oblysy Іshki ister departamenti janyndaǵy Qoǵamdyq keńestiń tóraǵasy boldy. 2011-2017 jyldary Qazaqstan Respýblıkasy Parlamenti Senatynyń Aqmola oblysynan saılanǵan depýtaty, Áleýmettik-mádenı damý jáne ǵylym komıtetiniń múshesi, 2019 jylǵy qyrkúıekten bastap Qazaqstan Respýblıkasy Parlamenti Senaty janyndaǵy Senatorlar keńesiniń múshesi, 2024 jyly Aqmola oblysy ákiminiń áleýmettik máseleler jónindegi shtattan tys keńesshisi boldy.

Asqar YDYRYSOV, QR Prezıdenti Ákimshiliginiń memlekettik ınspektory

1975 jyly Jezqazǵan qalasynda dúnıege kelgen. 1997 jyly Ó.A.Baıqońyrov atyndaǵy Jezqazǵan ýnıversıtetin taý-ken ınjeneri-elektromehanık mamandyǵy boıynsha, 2005 jyly Qazaq ulttyq tehnıkalyq ýnıversıtetin ekonomıst mamandyǵy boıynsha bitirgen. Ekonomıka ǵylymdarynyń kandıdaty.

Eńbek joly: 1997-1998 jyldary Jezqazǵan ýnıversıtetinde assıstent bolyp qyzmet etti. 1999 jyly Qazaqstan Respýblıkasynyń Shaǵyn bıznesti qoldaý agenttiginde jetekshi jáne bas maman, 1999-2001 jyldary Qazaqstan Respýblıkasynyń Tabıǵı monopolııalardy retteý, básekelestikti qorǵaý jáne shaǵyn bıznesti qoldaý agenttiginde bas maman, 2001 jyly «Qazaqoıl» UMK» JAQ-ta maman boldy. 2001-2003 jyldary Qazaqstan Respýblıkasynyń Tabıǵı monopolııalardy retteý agenttiginde basqarma bastyǵy, 2003 jyly Qazaqstan Respýblıkasy Indýstrııa jáne saýda mınıstrliginiń Shaǵyn bıznesti qoldaý komıtetinde basqarma bastyǵy bolyp taǵaıyndaldy.

2003-2008 jyldary Qazaqstan Respýblıkasy Premer-Mınıstri Keńsesinde konsýltant, bas konsýltant, sektor meńgerýshisi qyzmetterin atqardy. 2008 jyly Qazaqstan Respýblıkasy Indýstrııa jáne saýda mınıstrliginiń Strategııalyq josparlaý jáne taldaý departamentiniń dırektory, 2008 jylǵy qarashadan 2012 jylǵa deıin Qazaqstan Respýblıkasy Prezıdenti Ákimshiliginiń memlekettik ınspektory qyzmetin atqardy. 2012-2013 jyldary Qaraǵandy oblysy ákiminiń apparatyn basqardy. 2013 jyly Sátbaev qalasynyń ákimi, 2013 jylǵy qyrkúıekten 2014 jylǵy qańtarǵa deıin «Nur Otan» partııasy Ortalyq apparatynyń Aktıvterdi basqarý departamenti dırektorynyń orynbasary, 2014 jylǵy qańtardan 2016 jylǵy jeltoqsanǵa deıin «Nur Otan» partııasynyń Aktıvterdi basqarý departamentiniń dırektory boldy. 2016-2023 jyldary Sátbaev qalasynyń ákimi qyzmetin atqardy.

Qazirgi qyzmetin 2023 jylǵy qańtardan bastap atqaryp keledi.

Amankeldi DOSJANOV, QR Іshki ister mınıstrligi Tergeý departamenti bastyǵynyń orynbasary

1976 jyly Mańǵystaý oblysynda dúnıege kelgen. 1997 jyly QR Іshki ister mınıstrliginiń Almaty joǵary mektebin bitirgen.

Eńbek joly: 1997 jyly Mańǵystaý oblysy Aqtaý qalasy boıynsha Memlekettik tergeý komıtetiniń Qoǵamdyq tergeýler bólimindegi jeke adamǵa qarsy qylmystardy tergeý bólimshesiniń esirtki qylmystary, bopsalaý jáne jol-kólik oqıǵalaryn tergeý tobynyń tergeýshisi boldy. 1997-1999 jyldary Mańǵystaý oblysy Aqtaý qalalyq ishki ister basqarmasynyń tergeý bóliminde tergeýshi, 1999-2000 jyldary aǵa tergeýshi, 2000-2001 jyldary tergeý bóliminiń bastyǵynyń orynbasary qyzmetterin atqardy. 2001-2002 jyldary Mańǵystaý oblysy Aqtaý qalalyq ІІB tergeý bóliminiń múliktik qylmystardy tergeý bólimshesi bastyǵynyń orynbasary, keıin bastyǵy boldy; 2002-2005 jyldary Jańaózen qalalyq ІІB bólim bastyǵynyń orynbasary, tergeý bólimshesiniń bastyǵy qyzmetterin atqardy. 2005-2006 jyldary Mańǵystaý oblysy Túpqaraǵan aýdany ІІB bastyǵy, 2006-2007 jyldary Mańǵystaý oblystyq ІІD basqarmasy shtabynyń esepke alý-tirkeý tártibin baqylaý bóliminiń bastyǵy boldy. 2007-2008 jyldary Mańǵystaý oblystyq ІІD Tergeý basqarmasy bastyǵynyń orynbasary, 2008-2009 jyldary Mańǵystaý oblysy Qaraqııa aýdany ІІB tergeý bólimshesi bastyǵynyń orynbasary, keıin bastyǵy qyzmetterin atqardy. 2009 jyly Mańǵystaý oblystyq ІІD Uıymdasqan qylmysqa qarsy kúres basqarmasynyń jedel ýákili, keıin asa mańyzdy ister jónindegi aǵa jedel ýákili boldy. 2009-2014 jyldary Mańǵystaý oblysy Mańǵystaý aýdandyq ІІB bastyǵy, 2014-2015 jyldary Munaıly aýdandyq ІІB bastyǵy, 2015-2018 jyldary Jańaózen qalalyq ІІB bastyǵy qyzmetterin atqardy. 2018-2026 jyldary Mańǵystaý oblysy Polıtsııa departamenti bastyǵynyń orynbasary boldy.

Qazirgi qyzmetin 2026 jylǵy aqpannan bastap atqaryp keledi.

Sapar SATAEV, Temirtaý qalasynyń ákimi

1980 jyly Qaraǵandy oblysynda dúnıege kelgen. 2009 jyly D. Serikbaev atyndaǵy Shyǵys Qazaqstan memlekettik ýnıversıtetin avtomobıl joldary men aerodromdar qurylysy mamandyǵy boıynsha bitirgen.

Eńbek joly: 2002 jyly «Qazaqavtodor» RMK-da jumys istedi. 2002-2010 jyldary «Botaqara sý qojalyǵy» KMK dırektorynyń orynbasary, dırektordyń mindetin atqarýshy boldy. 2010-2013 jyldary Qaraǵandy oblysy Buqar jyraý aýdany Botaqara kentiniń ákimi, 2013-2015 jyldary Qaraǵandy oblysy Abaı aýdanynyń Abaı qalasynyń ákimi, 2015-2021 jyldary Qaraǵandy oblysy Buqar jyraý aýdany ákiminiń orynbasary boldy. 2021-2023 jyldary Prıozersk qalasynyń ákimi, 2023-2026 jyldary Balqash qalasynyń ákimi qyzmetterin atqardy.

Qazirgi qyzmetin 2026 jylǵy shildeden bastap atqaryp keledi.

Medet ShOTABAEV, qazaqstandyq opera ánshisi (tenor)

1981 jyly Semeı qalasynda dúnıege kelgen. 2003 jyly M.Tólebaev atyndaǵy mýzyka kolledjiniń vokal bólimin, Qurmanǵazy atyndaǵy Qazaq ulttyq konservatorııasynyń «Jeke án salý» bólimin bitirgen. 2008 jyly Italııadaǵy Renata Tıbaldı men Marıo del Monako atyndaǵy akademııany támamdaǵan.

Eńbek joly: Abaı atyndaǵy Qazaq memlekettik akademııalyq opera jáne balet teatrynyń solısi boldy. 2013 jyldan bastap «Astana Opera» memlekettik opera jáne balet teatrynyń jetekshi solısi qyzmetin atqaryp keledi.

Jetistikteri: 2003 jyly Qazaqstan jas oryndaýshylarynyń IV respýblıkalyq baıqaýynyń II oryn laýreaty atandy; 2005 jyly Semeıde ótken uly Abaıdyń 160 jyldyǵyna arnalǵan oblystyq baıqaýdyń Gran-prı júldesin ıelendi; 2006 jyly «Shabyt» IX halyqaralyq shyǵarmashyl jastar festıvaliniń Gran-prı ıegeri boldy; 2007 jyly Bıbigúl Tólegenova atyndaǵy vokalısterdiń halyqaralyq baıqaýynda I oryn aldy; 2008 jyly Italııanyń Porto-Rekanatı qalasynda ótken Benıamıno Djılı atyndaǵy halyqaralyq baıqaýdyń dıplomanty atandy; 2009 jyly Máskeýde ótken M. I. Glınka atyndaǵy XXIII halyqaralyq vokalıster baıqaýynda I oryn men úzdik tenorǵa arnalǵan arnaıy júldeni ıelendi, sondaı-aq Fınlıandııada ótken «XXI ǵasyr óneri» halyqaralyq baıqaýynyń Gran-prı júldegeri atandy; 2010 jyly Parıjde ótken «Bolashaqtyń úzdik daýystary» halyqaralyq baıqaýynda III oryn aldy; 2011 jyly «Operalııa-2011» baıqaýyna qatysty; 2012 jyly Rýmynııada ótken H. Darkle atyndaǵy halyqaralyq vokalıster baıqaýynyń Gran-prı júldesin jeńip aldy.

Marapattary: «Qazaqstannyń eńbek sińirgen qaıratkeri» qurmetti ataǵy; «Altyn Adam» ulttyq syılyǵynyń «2011 jylǵy Qazaqstannyń jyl adamy» atalymynyń laýreaty; «Otandyq opera sahnasynyń jaryq juldyzy» arnaıy syılyǵynyń ıegeri (Almaty, 2011); Italııa Juldyzy ordeniniń kavaleri (2018 jylǵy naýryz).

Rymkesh OMARHANOVA, keńestik, qazaq teatr aktrısasy, Qazaq KSR eńbek sińirgen ártisi

1939 jyly Qaraǵandy oblysynyń Qarqaraly qalasynda dúnıege kelgen. 1965 jyly Táttimbet atyndaǵy Qaraǵandy mýzykalyq ýchılışesiniń teatr fakýltetin akter mamandyǵy boıynsha bitirgen.

Eńbek joly: 1957 jyly halyq teatrynyń aktrısasy boldy; 1963 jyly Qaraǵandydaǵy S. Seıfýllın atyndaǵy oblystyq teatrdyń aktrısasy qyzmetin atqardy; 1973-1975 jyldary oblystyq halyq depýtattary keńesiniń II shaqyrylym depýtaty boldy; 1980-1982 jyldary Qaraǵandy qalalyq halyq depýtattary keńesiniń depýtaty boldy; 1990 jyly Q.Qýanyshbaev atyndaǵy Qazaq mýzykalyq-drama teatrynyń (Astana) aktrısasy boldy.

Marapattary: 1976 jyly «Qurmet belgisi» ordenimen, 2014 jyly «Qurmet» ordenimen marapattaldy. 1969 jyly «Tyń jerlerdi ıgergeni úshin», 1984 jyly «Eńbek ardageri» medaldaryn aldy. 1982 jyly Qazaq KSR eńbek sińirgen ártisi qurmetti ataǵyna ıe boldy.

2015 jyly «Synshylar tańdaýy» kınojúldesiniń «Ekinshi plandaǵy úzdik áıel róli» atalymy boıynsha laýreaty atandy. 2017 jyly Qazaqstan Respýblıkasy Tuńǵysh Prezıdentiniń mádenıet salasyndaǵy memlekettik stıpendııasyn ıelendi.

Teatr sahnasynda 150-den astam áıel beınesin somdaǵan. Olardyń qatarynda Ý.Shekspırdiń «Romeo men Djýletta» shyǵarmasyndaǵy Djýletta, Sh. Aıtmatovtyń «Ana — Jer-Ana» týyndysyndaǵy Álıman, M.Áýezovtiń «Eńlik-Kebek» pesasyndaǵy Eńlik, A.Ostrovskııdiń «Groza» dramasyndaǵy Katerına, Q.Bekhojınniń «Ulan-asý» pesasyndaǵy Aıtolqyn jáne Ioselıanıdiń «Arba aýdarylǵansha» shyǵarmasyndaǵy Kesarıo bar.