30 qazaqstandyq kompanııa Gulfood 2026 halyqaralyq kórmesinde óz ónimderin usyndy
ASTANA. KAZINFORM — Dýbaı qalasynda (BAÁ) álemdegi eń iri ári bedeldi azyq-túlik jáne sýsyndar ónerkásibine arnalǵan Gulfood 2026 halyqaralyq kórmesi ótip jatyr, dep habarlaıdy AShM baspasóz qyzmeti.
Qazaqstan bul jahandyq forýmǵa alǵash ret biryńǵaı Ulttyq pavılonmen qatysyp otyr. Bul shıkizattyq emes eksportty damytý jáne otandyq agroónerkásipkesheni ónimderin Taıaý Shyǵys pen Parsy shyǵanaǵy elderiniń basym naryqtaryna ilgeriletý jónindegi memlekettik saıasat aıasynda uıymdastyryldy.
Ulttyq pavılondy aralap kórgen Aýyl sharýashylyǵy mınıstri Aıdarbek Saparov elimizdiń kórmege qatysýynyń strategııalyq mańyzyna toqtaldy.
— Gulfood 2026 kórmesine qatysý — elimizdiń halyqaralyq naryqqa sapaly, qaýipsiz ári básekege qabiletti agroazyq-túlik ónimderin senimdi jetkizýshi bolýǵa daıyn ekenin kórsetetin mańyzdy qadam. Bul alań halyqaralyq dıstrıbıýtorlar men treıderlermen tikeleı B2B baılanystar ornatýǵa, Taıaý Shyǵys, Parsy shyǵanaǵy, Afrıka jáne Ońtústik Azııa naryqtaryna qazaqstandyq ónimderdiń eksportyn keńeıtýge, Kazakhstan brendin ilgeriletýge, sondaı-aq agroónerkásip keshenine sheteldik ınvestıtsııalar men tehnologııalyq seriktester tartýǵa múmkindik beredi, — dedi mınıstr.
Álemdik jetekshi brendtermen bir alańda 30 qazaqstandyq kompanııa óz ónimderin usynyp otyr. Onda eksportqa baǵyttalǵan 300-den astam ónim ataýy bar, onyń ishinde dándi daqyldar men olardy tereń óńdeý ónimderi, un, et jáne sút ónimderi, ósimdik maılary men maı ónimderi, sondaı-aq joǵary qosylǵan quny bar qaıta óńdelgen ónimder usynylǵan. Otandyq óndirýshilerdiń kópshiligi halyqaralyq akkredıtatsııadan ótken jáne Halal standarttaryna saıkeledi. Olardyń qatarynda Baltic Control Kazakhstan, Olzha Agro, Atameken Agro, Green Vitamin, QAYIP ATA áne basqa da kompanııalar bar.
— Qazaqstannyń kórmege qatysýy respýblıkalyq bıýdjet qarajatynsyz uıymdastyryldy, ıaǵnı barlyq shyǵyndy kompanııalardyń ózderi kóterdi. Bul bıznes salasynyń halyqaralyq naryqtarǵa degen qyzyǵýshylyǵynyń joǵary ekenin jáne eksporttyq áleýetti damytý jolyndaǵy strategııalyq kózqarasyn aıqyn kórsetedi. Qazaqstan áriptestikke, ınvestıtsııalarǵa jáne birlesken bastamalarǵa ashyq, — dep atap ótti Aıdarbek Saparov.
Aıta keteıik, Gulfood kórmesi jyl saıyn álemniń190-nan astam elinen myńdaǵan kompanııa men kásibı kelýshini biriktirip, azyq-túlik taýarlarynyń halyqaralyq saýdasyn damytýdaǵy negizgi platforma sanalady.
Gulfood 2026 kórmesi 30 qańtarǵa deıin jalǵasady.
Budan buryn Almatyda jelatın men kollagen óndiretin zaýyttyń qurylysy bastalǵany aıtyldy.