30 qańtarda eldegi qaı joldarda qozǵalys shekteldi
ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.
2026 jylǵy 30 qańtar saǵat 08:00-degi jaǵdaı boıynsha Mańǵystaý oblysynda kóktaıǵaq jáne qolaısyz aýa raıyna baılanysty respýblıkalyq mańyzy bar keıbir joldarynda kólik qozǵalysy shekteldi:
• «Dossor – Qulsary – Beıneý – Saı-Ótes – Shetpe – Jetibaı – Aqtaý» respýblıkalyq jolynyń 338-632-shaqyrym aralyǵy (Beıneý aýyly men Shetpe aýyly arasyndaǵy ýchaske);
• osy joldyń 632-718-shaqyrym aralyǵy (Shetpe aýyly men Jetibaı aýyly arasyndaǵy ýchaske).
Sondaı-aq Pavlodar oblysynda «Astana – Shiderti – Pavlodar – Ýspenka – RF shekarasy» avtojolyndaǵy kópir ótkeliniń shetki arqalyqtary zaqymdanýyna baılanysty «Qalqaman» jol aıryǵy ýchaskesi – Qalqaman aýylyna kireberis jáne Astana baǵytyna shyǵatyn jol jabyldy.
Eske salaıyq, buǵan deıin «Qazgıdromet» RMK 30 qańtarda eldiń basym bóliginde aýa raıyna baılanysty eskertý jasady.
Sınoptıkterdiń boljamynsha, Qazaqstan aýmaǵynyń basym bóliginde jaýyn-shashynsyz aýa-raıy saqtalady. Tek eldiń batysynda, soltústiginde, ońtústiginde atmosferalyq frontaldy bólimderdiń ótýimen qar, jaıaý burqasyn bolady. Respýblıka boıynsha jel kúsheıip, tuman, kóktaıǵaq boljanady.