«30 ıgi is»: Atyraý oblysynda múgedekterge 36,5 mln teńge turatyn ınvataksı syıǵa berildi

ATYRAÝ. QazAqparat – Atyraý oblysyndaǵy sheteldik kompanııa Jylyoı aýdanynda turatyn múmkindigi shekteýli jandar úshin 36,5 mıllıon teńgege satyp alynǵan ınvataksıdi syıǵa tartty, dep habarlaıdy QazAqparat.

Jylyoı aýdany ákiminiń orynbasary Gúlnafıs Aıshýaqovanyń aıtýynsha, Jac Sunray markaly ınvataksı «30 ıgi is» aktsııasy aıasynda syıǵa berilgen.

«Shaǵyn avtobýsta 6 jolaýshyǵa arnalǵan oryn bar. Erekshe qajettiligi bar adamdardy qaýipsiz tasymaldaýǵa beıimdelgen. Birden eki arbaǵa arnalǵan arnaıy tirekpen, 300 kelige deıin júkti kótergishpen jabdyqtalǵan. Kóliktiń jalpy quny – 36,5 mln teńge», -deıdi Gúlnafıs Aıshýaqova.

Munaı-gaz ónerkásibi salasyndaǵy kompanııanyń úkimetpen jáne jurtshylyqpen baılanys bóliminiń bas menedjeri Dármen Aronovtyń aıtýynsha, ınklıýzıvti ortany damytýǵa erekshe kóńil bólingen.

«Bizdiń kompanııa birneshe jyldan beri «Áleýmettik ınvestıtsııalar» baǵdarlamasyn iske asyryp keledi. Bıyl «Biz de adambyz» jobasyna demeýshilik kórsetip otyr. Bul jobanyń nátıjesinde múmkindigi shekteýli jandar álemdi jańasha tanýdy, qoǵam ókilderimen etene aralasýǵa beıimdeledi. Jaqynda Jylyoı aýdanynda da «Tıimdi ońaltý lageri» is-sharasyn ótkizýdi josparladyq», - deıdi Dármen Aronov.

Eske sala ketelik, buǵan deıin Atyraýda múgedekterdi ońaltýǵa arnalǵan ortalyqqa jańa jabdyqtar alynǵanyn jazǵan edik.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, sheteldik kompanııa múgedekterdi ońaltýǵa arnalǵan 9 túrli apparatty syıǵa tartqan.

Sondaı-aq, Atyraýda múgedektigi bar adamdar úshin 150 oryndyq ońaltý ortalyǵy salynatynyn habarlaǵan bolatynbyz.