30-ǵa tarta turǵynnyń aqshasyn qoldy etken túrkistandyq egde jastaǵy áıel sottaldy
MAQTAARAL. QazAqparat – Túrkistan oblysynda 30-ǵa tarta turǵyndy aldaǵan alaıaq áıel bas bostandyǵynan aıyryldy, dep habarlaıdy QazAqparat óńirlik polıtsııa departamentine silteme jasap.
Sáýir aıynyń sońynda Túrkistan oblysynyń polıtseıleri jumysqa ornalastyramyn dep 30-ǵa jýyq turǵyndy aldaǵan alaıaq áıeldi ustaǵan bolatyn. Egde jastaǵy azamatsha eshqaıda tirkelmegen múgedek balalardy ońaltý ortalyǵyna jumysqa qabyldaımyn dep aldap, ár adamnan 300 000-700 000 teńge aralyǵynda aqshalaryn alyp ketken bolatyn.
Osy jaıtqa baılanysty QR QK-niń 190-baby «Alaıaqtyq» boıynsha is tirkelip,sotqa deıingi tergep-tekserý amaldary júrgizilgen edi.
Polıtseıler jetkilikti dáleldemeler negizinde kináni moıyndaý týraly mámile nysanyndaǵy protsestik kelisim jasalyp, QR QPK 612-babynyń (onsha aýyr emes, aýyrlyǵy ortasha ne aýyr qylmystar boıynsha – kúdikti, aıyptalýshy keltirilgen kúdikpen, aıyptaýmen kelisken jaǵdaıda – kináni moıyndaý týraly mámile nysanynda) talabyna saı Maqtaaral aýdandyq sotyna joldanǵan.
Maqtaaral aýdandyq sotynyń úkimimen kúdikti áıelge qatysty 3 jyl 6 aı bas bostandyǵyn shekteý jazasy taǵaıyndaldy.
Túrkistan oblysynyń polıtseıleri azamattarǵa alaıaqtardan barynsha saq bolýdy eskertedi. Kez kelgen usynysty qabyl almaı, tolyq tekserip alyńyz dep keńes beredi.
