3 jyldyq bıýdjette mańyzdy áleýmettik máselelerdi sheshýge jetkilikti qarajat qarastyrylǵan
«Biz búgin 2023-2025 jyldarǵa arnalǵan jalpy sıpattaǵy transfertterdiń kólemi týraly, Ulttyq qordan kepildendirilgen transfertter týraly jáne aldaǵy 3 jylǵa arnalǵan respýblıkalyq bıýdjet týraly zań jobalaryn qaradyq. Prezıdentimiz belgilep bergen mindetterdi oryndaý - memlekettik bıýdjet shyǵystarynyń negizgi basymdyǵy. Jalpy, bıýdjet jan-jaqty qarastyrylyp, pysyqtalǵan qujat boldy dep esepteımiz. Búgin qaralǵan respýblıkalyq bıýdjettiń jobasynda qoǵamdy alańdatqan mańyzdy áleýmettik máselelerdi sheshýge jetkilikti qarajat qarastyrylǵan. Memleket basshysy áleýmettik salaǵa qatysty naqty tapsyrmalar bergeni belgili. Ásirese, aýyldyq jerlerde ómir súrý sapasyn arttyrýǵa aıryqsha kóńil bólinýde. Olardy iske asyrý – strategııalyq mindet», - dedi ol palatanyń jalpy otyrysynda.
Senat spıkeriniń atap ótýinshe, osyǵan baılanysty «Jaıly mektep» ulttyq jobasy qolǵa alyndy. Jobany iske asyrý úshin aldaǵy úsh jylda shamamen 2,6 trln teńge bólinetin bolady. Sonyń nátıjesinde jańa oqýshy oryndarynyń sany 820 myńnan asýǵa tıis.
«Osy arqyly elimizdegi úsh aýysymdy mektep problemasy jáne bir synyptaǵy balalar sanynyń shamadan tys kóp bolýy negizinen sheshiledi dep senemiz. Sondaı-aq áleýmettik tólemderdi ındeksteýge, muǵalimder men dárigerlerdiń jáne azamattyq qyzmetkerlerdiń jalaqysyn 25 paıyzǵa arttyrýǵa tıisti qarajat qarastyryldy. Jergilikti bıýdjetterge jalpy transfertterdi eskersek, kelesi jyly áleýmettik shyǵystar 2 trln teńgege, ıaǵnı shamamen 20 paıyzǵa ósedi. Sonymen qatar biz Ulttyq qordan transfertter kólemin kezeń-kezeńimen qysqartýdy da josparlanyp otyrmyz», - dedi Máýlen Áshimbaev.
Senat tóraǵasy Memleket basshysynyń sheshimine sáıkes, Ulttyq qordyń ınvestıtsııalyq tabysynyń jartysy balalardyń jınaqtaý shottaryna aýdarylatyndyǵyna da toqtaldy.
«Atalǵan tólemder 2023 jyldyń qorytyndysy boıynsha júzege asyrylady. Bul - Ulttyq qor bolashaq urpaqtyń qoryna aınalady degen sóz», - dedi joǵary palata spıkeri.
