3 jyldan keıin elimizde metaldy, kólik maıy men batareıalardy polıgonǵa kómýge tyıym salynady
ASTANA. QazAqparat - Qazirgi kezde qatty turmystyq qaldyqtardy basqarý júıesi ony jınaý, tasymaldaý, suryptaý, óńdeý jáne kómýden turady. Qaldyqtardy basqarý baǵdarlamasyna sáıkes, aldaǵy bes jylda Astanada jańa tehnologııalar engiziledi, onyń ishinde metan alý men «jasyl» energııa óndirý. Sonymen qatar, qoqysty qaıta óńdeý men órteýdi ulǵaıtý múmkindikteri qaralýda, dep habarlaıdy elordanyń resmı saıty.
«Biz aldaǵy bes jylda paıdalanatyn tehnologııalardy belgiledik. Atap aıtqanda, polıgondaǵy qoqystan gaz shyǵarý jáne saǵatyna 5 MVt deıin «jasyl» energııa óndirý. Al 2020 jylǵa deıin qol jetkizýdi maqsat etip otyrǵan basty kórsetkish - qaıta óńdeý tereńdigin 50% deıin ulǵaıtý bolmaq», - dedi «Astana qalasynda qaldyqtardy basqarý jónindegi baǵdarlamany talqylaý» taqyrybynda ótken dóńgelek ústel barysynda qalalyq Tabıǵı resýrstar jáne tabıǵat paıdalanýdy retteý basqarmasynyń basshysy Ádilbek Sársembaev.
2020 jylǵa deıin elordada qaldyqtardy jınaýdyń qazirgi zamanǵy ádisterin qoldaný úshin konteınerlerdi jańartý jáne qoqys tasıtyn mashınalar parkin áldeqaıda únemdi jáne ekologııalyq turǵydan tıimdi kóliktermen almastyrý josparlanyp otyr.
«Qazaqstandyq MJS ortalyǵy» AQ vıtse-prezıdenti Aıdos Kóbetovtyń atap ótýinshe, álemdik tájirıbede qoqysty jartylaı óńdeý jáne órteý qoldanylady, tek 10-15% ǵana kómiledi.
«Biz usynysymyzdy QR Energetıka mınıstrligine joldadyq. Bul jerde ekologııa jaǵynan máseleler bar, biraq qazirgi kezdegi tehnologııalar onyń saldaryn barynsha azaıtýǵa múmkindik beredi», - deıdi Aıdos Kóbetov.
Shara barysynda 2019 jylǵa qaraı elimizde quramynda synap bar shamdy, quraldardy, tústi jáne qara metalldy, óńdelgen avtomobıl maıy men suıyqtyqtardy, batareıalardy jáne t.b. polıgondarda kómýge tyıym salynatyny belgili boldy. Bul týraly QR Energetıka mınıstrligi Qaldyqtardy basqarý departamentiniń dırektory Jan Nurbekov málim etti.
Aıta keteıik, qazirgi kezde elordada qatty turmystyq qaldyqtardy shyǵarý kólemi táýligine 1000 tonnany quraıdy. Elordalyq qoqys óńdeý zaýyty táýligine 200 tonnaǵa jýyq qoqys qabyldaıdy, ótken jyly jalpy 73 myń tonna qoqys jınaldy. Onyń 93% polıgonda kómiledi. 2015 jyly bul kórsetkish 360 myń tonnaǵa jýyq boldy.
