3 jylda bilim berý salasynyń 386 qyzmetkeri jemqorlyq quqyq buzýshylyqqa barǵany úshin sottaldy - G.Ábdiqalyqova

ASTANA. QazAqparat - 3 jylda bilim berý salasynyń 386 qyzmetkeri jemqorlyq quqyq buzýshylyqqa barǵany úshin sottaldy. Bul týraly búgin Aqordada ótken Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııa otyrysynda QR Memlekettik hatshysy Gúlshara Ábdiqalyqova aıtty.

«Jemqorlyqqa qarsy strategııada qazaqstandyq qoǵamnyń jemqorlyqqa qarsy ádebi men mádenıeti «Máńgilik el» ıdeologııasy turǵysynda qalyptasýy tıis. 5 ınstıtýttyq reformany júzege asyrýdyń 100 naqty qadamy» Ult josparynda Memleket basshysy bilim berý máselesine aıryqsha mán bergen. 5 jyl ishinde bilim berý salasyna memlekettik shyǵystar 2011 jylǵy 1 trln. teńgeden 2015 jyly 1,37 trln. teńgege deıin ósti, - dedi G.Ábdiqalyqova.

Memlekettik hatshy bilim berý salasyndaǵy jemqorlyqqa qarsy qoldanylyp otyrǵan sharalardyń áli de jetkiliksiz bolyp otyrǵandyǵyn basa aıtty. Máselen, qarjylyq baqylaý komıtetiniń 2014-2015 jyldar men 2016 jyldyń 1 toqsany kezeńderine júrgizgen tekserý nátıjesinde zańnamanyń 116 mlrd. teńgege buzylǵany anyqtalǵan.

«Memlekettik satyp alý týraly zańnamany, bıýdjet zańnamasyn buzǵany úshin 1040 laýazymdy tulǵa ákimshilik jaýapkershilikke tartylyp, bilim berý salasynyń 386 qyzmetkeri jemqorlyq quqyq buzýshylyqqa barǵany úshin sottaldy», - dedi ol.

Jıyn barysynda QR Bas prokýrory J.Asanovtyń, Ulttyq bank tóraǵasy D.Aqyshevtiń, Qarjy mınıstri B.Sultanovtyń, Bilim jáne ǵylym mınıstri E.Saǵadıevtiń, Memlekettik qyzmet isteri mınıstri T.Donaqovtyń baıandamalary tyńdaldy.

Komıssııa otyrysyna beıne selektorlyq rejimde oblystardyń, Astana jáne Almaty qalalarynyń ákimderi, sybaılas jemqorlyqqa qarsy is-qımyl jónindegi óńirlik komıssııalardyń músheleri, bilim departamentteriniń basshylary jáne joǵary oqý oryndarynyń rektorlary qatysty.